Atbasardyń tasqyn sýǵa qarsy salynǵan jańa bógetine 200 mln teńge jumsalǵan
ASTANA. QazAqparat - Atbasardyń tasqyn sýǵa qarsy salynǵan jańa bógetine 200 mln teńge jumsalǵan. Bul jaıynda búgin Úkimettiń selektorlyq rejimdegi otyrysynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
Mınıstrdiń dereginshe, Aqmola oblysynda eń kúrdeli ahýalAtbasar qalasynda qalyptasyp otyr. Bul aımaqta Jabaı ózeniniń sý deńgeı kúrt kóterilip, ótken jyly salynǵan qorǵanys bógetti buzyp ketken. Sonyń saldarynan 269 úı sý astynda qalsa, taǵy 130-dan astam úıdi sý basý qaýpi bar.
«Tańerteń sý deńgeıiniń 40 santımetrge tómendeýi baıqaldy. Eń qaýipti deńgeı 6 metr 10 santımetr bolsa, búgin tańerteń 5 metr 70 santımetr boldy. Qazirgi ýaqytta bógetti salý barysynda salǵyrttyqqa jol berý faktisi boıynsha qylmystyq is qozǵalyp, tergeý amaldary júrgizilýde», - dedi ol.
Osy rette Úkimet basshysy Atbasar bógetin salýǵa qansha aqsha bólingenin jáne merdigerdiń kim ekendigin aıtýdy talap etti.
«Jergilik atqarýshy organ tarabynan 200 mln teńge bólindi. Biz qylmystyq is qozǵadyq, merdiger tolyqtaı tekseriletin, tergeletin bolady. Atalǵan bógettiń daıyndyǵy boıynsha saraptama júrgizemiz», - dedi óz kezeginde Qasymov.
Al Aqmola oblysynyń ákimi Málik Myrzalınniń aıtýynsha, bógetti kókshetaýlyq kompanııa ázirlep, qurylys jumystaryn elordalyq merdiger uıym júzege asyrǵan.
«Jalpy, Aqmola oblysynda 12 aýdannyń 35 jolyn sý shaıyp, 37 eldi mekendi sý basqan. Sý basqan aýmaqta 893 úı bar. Der ýaqytynda 2 400 turǵyn, 220 bas mal qaýipsiz jerge kóshirildi. Búgingi derekterge sáıkes 318 úıden sý shyǵarylyp, 307 adam óz baspanalaryna oraldy», - dedi oblys basshysy.
Sonymen qatar ol qazirgi ýaqytta úılerin sý basqan 1 619 adam týǵan-týystarynyń nemese arnaıy uıymdastyrylǵan oryndarda ekendigin atap ótti. Apattan qutqarý jumystaryna óńirde 1 055 adam jumyldyrylǵan.
