Atbasardy «sý basyp», qutqarý sharalary qolǵa alyndy
KÓKShETAÝ. QazAqparat - Atbasar aýdanynda «Kóktem-2018» respýblıkalyq komandalyq-shtabtyq oqý-jattyǵýynyń aıasynda azamattyq qorǵaý avarııalyq-qutqarý qyzmetteri men quramalarynyń arnaıy-taktıkalyq oqý-jattyǵýlary ótkizildi, dep habarlaıdy QazAqparat tilshisi.
Aqmola oblysynyń ishki saıasat basqarmasynyń málimetine qaraǵanda, Respýblıkalyq komandalyq-shtabtyq oqý jattyǵýlarynyń barysynda qalanyń tirshilikpen qamtamasyz etý obektileriniń, tótenshe jaǵdaılar qyzmetteriniń, aýdandar ákimi apparatynyń ókilderi ishinen jedel shtab jumysy uıymdastyryldy.
Osy is-shara aıasynda Atbasar aýdanynyń ákimi Amanbek Qaljanov jáne Aqmola oblysy Atbasar aýdany tótenshe jaǵdaılar bóliminiń bastyǵy azamattyq qorǵaý podpolkovnıgi E.Turmaǵanbetov kóktemgi sý tasqyny kezeńindegi tótenshe jaǵdaılar qaýpine den qoıýǵa aımaqtyń azamattyq qorǵaý qyzmetteri men aýdannyń shuǵyl den qoıý jasaǵynyń ázirligin baıqap tekserdi.
Bólimderdiń kelýiniń jedeldigi, jaýyngerlik qabilettiligi baǵalanyp, jeke quramnyń óz mindetterin bilýi tekserilgen. Tótenshe jaǵdaılardaǵy qutqarý jumystaryna jáne basqa da apattardyń saldarynan zardap shekkenderge ýaqtyly kómek kórsetýge tehnıkalar men qural-jabdyqtardyń ázirligi men jaramdylyǵyna erekshe kóńil bólindi.
Sapqa turýǵa jeke quramnan 270 adam jáne 94 birlik tehnıka tartyldy. Baıqaýdyń qorytyndysy boıynsha, aýdandyq shuǵyl den qoıý jasaǵy sý tasqyny kezeńinde qutqarý jáne basqa da kezek kúttirmeıtin jumystardy júrgizýge «daıyn» degen baǵa aldy. Baıqaýdan keıin sý tasqyny kezeńinde tótenshe jaǵdaılardy joıý boıynsha kúshteri men quraldardy is júzinde qoldanýymen 3 oqý oryndarynda arnaıy-taktıkalyq oqý-jattyǵý uıymdastyryldy.
Oqý-jattyǵý barysynda basqarý organdarynyń tájirıbelik daǵdylaryn jetildirý máselesi, sondaı-aq 2018 jylǵy kóktemgi sý tasqyny kezeńinde yqtımal tótenshe jaǵdaılardy joıý kezinde avarııalyq-qutqarý jáne basqa da kezek kúttirmeıtin jumystardy júrgizý kezinde azamattyq qorǵaý quramalary men avarııalyq-qutqarý qyzmetteriniń birlesken is-qımylynyń úılesimdiligi pysyqtaldy.
Atbasar aýdanynyń ákimi A.Qaljanov arnaıy-taktıkalyq oqý-jattyǵý sátti ótkenin atap ótti.
«Arnaıy-taktıkalyq oqý-jattyǵýǵa barlyǵy 99 adam jáne 18 birlik arnaıy, órt, avarııalyq-qutqarý, ınjenerlik tehnıka tartyldy», - dedi aýdan ákimi.
