Atbasardaǵy bóget asa aýqymdy mólsherdegi sýdy ustap qaldy - TJK bastyǵy
NUR-SULTAN. QazAqparat - Atbasar aýdanyndaǵy bóget asa aýqymdy mólsherdegi sý mólsherin ustap tur. Bul týraly elordadaǵy búgingi brıfıngte QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Eki kún boıy avtokólik kópirindegi sý deńgeıi 385 santımetrge kóterilgenin baqylaǵan edik. Bul kórsetkish - bıylǵy jyldyń eń joǵary deńgeıi ekenin atap ótý kerek. Alaıda táýlik ishinde sý deńgeıi tómendep, 3,5 metrge tústi. Bir táýlik boıy osy deńgeıde saqtalyp tur. Ol jerde qaýipti deńgeı 3,54 m. ıAǵnı, sý 40 santımetrge asyp tur. Jaǵalaý boıy bóget salynyp, buryn ol jarylyp ketetin edi. Tipti oǵan qatysty qylmystyq is te qozǵalǵan. Alaıda bóget osy joly sýdyń bárin ustap qaldy», - deıdi Vladımır Bekker vedomstvoda ótken brıfıngte.
Komıtet tóraǵasynyń boljaýynsha Atbasar aýdanynda sý deńgeıiniń tómendeýi búginnen bastalady.
«Búgin sý deńgeıi tómendeı bastaıdy dep boljap otyrmyz. Bas jaǵynda-aq sýdyń azdap azaıyp kele jatqany baıqalady. Bıyl Atbasar osynaý kezeńdi sátti ótkizer degen úmitimiz bar. Atbasar aýdanyndaǵy Jabaı ózeniniń deńgeıi Atbasarǵa qaýip tóndirerlik burynǵy deńgeıde (3,50 m, qaýipti jaǵdaı 3,45 m) qalyp otyr. Bóget sýdy ustap qaldy. Búgin sý deńgeıi tómendeýi kerek. Turaqty túrde monıtorıng júrgizilip otyrǵanyn atap ótkim keledi», - deıdi ol.
Bekkerdiń sózine sensek, Sandyqtaý aýdanynda da sý deńgeıi tómendep keledi.
«Sandyqtaý aýdanynda Sandyqtaý aýylyna qaýip tóndirerlik Jabaı ózeniniń sý deńgeıi 2,3 metr bolyp otyr. Qaýipti deńgeı ol jerde - 3,2 metr. Balkashıno aýylynda sý deıgeıi 1,55 m deńgeıinde. Ol jerdegi qaýipti deńgeı - 2,20 m. Sý jaǵasynda mamandar turaqty taldaý jumystaryn júrgizip otyr», - deıdi Vladımır Bekker.
Eske sala ketsek, ótken aıdyń sońynda QR ІІM Tótenshe jaǵdaılar komıteti Aqmola jáne Qaraǵandy oblystarynda sý basý qaýpi bar aýmaqtarda aldyn alý sharalary men qaýipterdi joıý jumystary júrgizilip jatqanyn málim etken edi.
https://kaz.inform.kz/news/eldi-mekenderdi-su-basu-kaupi-zhok-kr-iim-tzhk_a3512515
