Atbasardaǵy bóget 63 mln teńgege salynǵan - depýtat
ASTANA. QazAqparat - Qazaqstan Parlamenti Májilisiniń depýtaty Pavel Kazantsev sý tasqyny bolǵan Atbasardaǵy jańa bógettiń 63 mıllıon teńgege salynǵanyn málim etti, dep habarlaıdy «QazAqparat» HAA tilshisi.
«Atbasar qalasynda sýdy ustap turýy tıis bóget qurylysyna 200 mıllıon teńge bólindi, alaıda sońǵy ýaqytta bolǵan sý tasqyny oqıǵalary onyń 63 mıllıon teńgege salynǵanyn kórsetti. Bóget tabıǵı apattyń alǵashqy soqqysyna da tótep bere almady. Qala turǵyndary edáýir materıaldyq shyǵynǵa ushyrady. Onyń ústine, taǵy da jańa bóget turǵyzý kerek. «Sarań eki ret tóleıdi» degen halyq danalyǵy osyndaıda aıtylǵan», - dep málimdedi ol «Atameken» UKP Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Mundaı málimetterdi depýtat memlekettik satyp alýlar júıesindegi sybaılas jemqorlyq týraly baıandamasynda keltirdi. Memlekettik qyzmet jáne sybaılas jemqorlyqqa qarsy is-qımyl agenttiginiń derekterine súıensek, memlekettik satyp alýlar ekonomıkanyń jemqorlyqqa toly salalarynyń biri bolyp keledi. Іs júzinde árbir besinshi sybaılas jemqorlyq qylmysy memlekettik satyp alýmen baılanysty.
«Quramyna keńes múshelerinen bólek, Memlekettik qyzmet jáne sybaılas jemqorlyqqa qarsy is-qımyl agenttiginiń ókilderi engen jumys toby bıznes ókilderimen de, satyp alýlar júrgizetin memlekettik organ ókilderimen de kezdesti. Biz memlekettik satyp alýlar týraly zańnamaǵa taldaý jasadyq jáne túrli salalar men túrli óńirlerde qalyptasqan memlekettik satyp alýlar júrgizý tájirıbesin zerttedik», - dep atap ótti ol.
Buǵan deıin QR Іshki ister mınıstri Qalmuhanbet Qasymov habarlanǵandaı, Atbasardyń tasqyn sýǵa qarsy salynǵan jańa bógetine 200 mln teńge jumsalǵan . Aqmola oblysynyń ákimi Málik Myrzalınniń aıtýynsha, bógetti kókshetaýlyq kompanııa ázirlep, qurylys jumystaryn elordalyq merdiger uıym júzege asyrǵan.
Keıinirek, Atbasar aýdanynyń ákimi Andreı Nıkıshov tsıfrdy naqtylady. Onyń aıtýynsha, 2015 jyly sý tasqynyna qarsy sharalar aıasynda 9 shaqyrymdyq bóget nyǵaıtyldy. Jumystardy júrgizýge 95 mıllıon teńge bólingen. Іs júzinde bul jumystar 80 mıllıon teńgege júrgizilgen.
«Úıindi turǵyzýda keıbir atbasarlyqtardyń baqshasyn qurban etýge týra keldi, keı jerlerde sharýashylyq qurylystarǵa nuqsan keldi. Sý tasqynynan keıin úı ıelerine barlyq qurylystardy qalpyna keltirýge kómek berdik. Ózge oryndardan jer úlesteri bólindi, qaıtadan qunarly topyraq ákelindi. Bul jumystarǵa 63 mıllıon teńge bólindi. Mine, osylaısha keıbir BAQ habarlaǵan 200 mıllıonnan astam teńge emes, 158 mıllıon teńge shyǵady», - dedi A.Nıkıshov.
Sońǵy derekterge sáıkes, Atbasar aýdanynda shyǵyndy baǵalaý boıynsha táýelsiz saraptaý komıssııasy turǵyndardan 581 ótinish qabyldady, onyń 460-y Atbasar qalasynan kelip túsken. Táýelsiz saraptaý komıssııasy 429 úıdi tekserip, Atbasar qalasyndaǵy 331 úıdiń, Pokrovka aýylyndaǵy 32 úıdiń, Sadovyı aýylyndaǵy 3 úıdiń apattyq jaǵdaıda turǵanyn málimdedi. 133 úıge (Atbasardaǵy 109, aýyldardaǵy 24) jóndeý jumystaryn qajet dep tapty .
