Atbasardaǵy mýzeıde Sáken Seıfýllınniń ómiri men murasyna arnalǵan kórme ashyldy
ASTANA. KAZINFORM – Atbasar qalasyndaǵy Іlııas Esenberlınniń ádebı mýzeıinde Astana qalalyq Birlesken mýzeıler dırektsııasynyń uıymdastyrýymen «Sáken Seıfýllın: taǵdyr men taǵylym» atty kórme ashyldy. Kórme qazaqtyń belgili memleket jáne qoǵam qaıratkeri, aqyn, jazýshy, ustaz Sáken Seıfýllınniń ómiri, shyǵarmashylyǵy jáne qoǵamdyq qyzmetin kórsetýge baǵyttalǵan.
Ekspozıtsııada HH ǵasyrdyń kúrdeli kezeńderinen aman qalǵan biregeı mýzeı jádigerleri usynyldy. Olardyń ishinde Sáken Seıfýllınniń jeke zattary, turmystyq buıymdary, sırek kitaptary, tarıhı qujattary, fotosýretteri jáne ádebı murasyna qatysty materıaldar bar. Bul eksponattar arqyly kelýshiler aqynnyń tulǵasyn naqty derekter negizinde tanyp, onyń ómir súrgen dáýiriniń tarıhı-áleýmettik jaǵdaıyn tereńirek túsindi.
Kórme úsh negizgi bólimnen quraldy: «Sáken Seıfýllınniń ómir joly», «Sáken Seıfýllınniń qyzmeti» jáne «Sáken Seıfýllınniń murasy». Іs-shara barysynda kelýshiler aqynnyń otbasy, turmysy, qoǵamdyq qyzmeti men ádebı murasyna qatysty qundy materıaldarmen tanysty. Sonymen qatar HH ǵasyr basyndaǵy qazaq qoǵamynyń rýhanı beınesi jan-jaqty kórsetildi.
Kórmeni uıymdastyrýshylardyń aıtýynsha, mundaı jobalar tarıhty tek oqyp qana qoımaı, ony kózben kórip, júrekpen qabyldaýǵa múmkindik beredi.
– Bul ekspozıtsııa Sáken Seıfýllınniń kópqyrly tulǵasyn tereńirek tanytýǵa baǵyttalǵan. Usynylǵan biregeı jádigerler arqyly biz tek bir adamnyń ómir jolyn ǵana emes, tutas bir dáýirdiń tarıhı-rýhanı beınesin jáne halqymyzdyń taǵdyrly kezeńderin bile alamyz. Kórme mazmuny Sákenniń balalyq shaǵynan bastap, qoǵamdyq qyzmeti men ádebı murasyna deıingi kezeńdi qamtıdy. Bul bastama ulttyq tarıh pen mádenı muraǵa qurmetti arttyryp, óskeleń urpaqtyń sanasynda rýhanı sabaqtastyqty nyǵaıtýǵa yqpal etedi, - dedi kórme kýratory Nurserik Jolbarys.
Kórmeniń ashylýynda sóz sóılegen tarıh ǵylymdarynyń doktory, professor, Dırektsııa dırektorynyń orynbasary Marat Absemetov mundaı sharalardyń mańyzdylyǵyn atap ótti.
– Búgin – elimiz ben Atbasar qalasy úshin mańyzdy kún. 28 jasynda Qazaq halyq komıssarlar keńesiniń tóraǵasy bolyp, memleketimizdiń irgetasyn qalaýda belsendi qyzmet etken Sáken Seıfýllınniń kórmesi uıymdastyryldy. Nebári 44 jyl ómir súrgen qaıratkerdiń kúreske toly ǵumyry – asyl qazyna. Astanadaǵy Sáken Seıfýllın mýzeıiniń kórmesi alǵash ret Atbasar qalasynda ótti. Jeti myńnan astam mýzeı qorynan tańdalǵan eń qundy jádigerler, fotosýretter men tarıhı qujattar osy kórmede usynyldy. Kórme aldaǵy ýaqytta basqa qalalarda da jalǵasady, - dedi ol.
Kórme Atbasar qalasyndaǵy Іlııas Esenberlınniń ádebı mýzeıinde 30 sáýirge deıin ótedi. Odan keıin ekspozıtsııa Taldyqorǵan jáne Oral qalalarynda kórsetiledi.
Buǵan deıin Samarqandtaǵy kórmede Ámir Temirdiń syıǵa tartqan týy men tarıhı jádigerleri qoıylǵanyn jazǵanbyz.
