Atbasardaǵy lokomotıv zaýytynyń qurylysy nelikten aıaqsyz qaldy
ASTANA. KAZINFORM — Atbasardaǵy lokomotıv zaýytynyń qurylysy ınvestor qarajat taba almaýyna baılanysty toqtady. Bul týraly Úkimet otyrysynan keıingi brıfıngte Kólik vıtse-mınıstri Maqsat Qalıaqparov aıtty.
— Ózderińiz biletindeı, ol zaýytty qytaı ınvestorlary salý kerek edi. Biraq, ınvestordyń qarajaty bolmaı sozylyp ketti. Qazir basqa ınvestor taýyp, zaýytty salýǵa tyrysyp jatyr. Elimizde lokomotıv parki tolyǵymen qamtamasyz etilgen. Aldaǵy ýaqytta birqatar lokomotıvtiń paıdalaný merzimi aıaqtalady. Sol kezde ınvestorlar atalǵan zaýytty salady. Búginde qurylys jumys toqtap tur, — dedi vıtse-mınıstr tilshiler saýalyna oraı.
Onyń aıtýynsha, qytaılyq ınvestor qujattaryn mınıstrlikke kórsetken jáne bári durys bolǵan. Alaıda, ınvestor zaem qarajat tarta almaı qalǵan.
— Nysan jumys istep turǵan zaýyttyń janyna salynýy tıis edi. Ondaı bolyp turady, jeke ınvestor. Salamyz, qarajat tabamyz dep talpyndy. Salýǵa ruqsat berdik, — dedi Maqsat Qalıaqparov.
Esterińizge sala ketsek, 2024 jyldyń tamyzynda Aqmola oblysynyń ákimi Marat Ahmetjanovtyń, Kólik vıtse-mınıstri Maqsat Qalıaqparov pen «Qazaqstan temir joly» AQ tóraǵasynyń orynbasary Talǵat Aldybergenovtiń qatysýmen Atbasarda lokomotıv qurastyrý zaýytyn salýdy bastaý qurmetine kapsýla salynǵan edi. Sol kezde 2025 jyly paıdalanýǵa beriletin zaýyt magıstraldy elektrovozdardyń 200 sektsııasyn jáne manevrlik teplovozdardyń 60 sektsııasyn shyǵaratyny habarlanǵan bolatyn.
Aıta ketelik Wabtec-ten 300 lokomotıvti 1 mlrd dollardan astam aqshaǵa satyp alynatyny týraly jazǵan edik.
