Atbasarda jazasyn óteýshilerdi uryp-soǵý isi boıynsha QAJK-niń 12 qyzmetkerine úkim shyqty

ASTANA. KAZINFORM – Atbasarda jazasyn óteýshilerdi uryp-soǵý isi boıynsha Qylmystyq-atqarý júıesi komıtetiniń 12 qyzmetkeriniń árqaısysyna bir jylǵa bas bostandyǵyn shekteý jazasy taǵaıyndaldy. Buǵan deıin olar eki ret aqtalǵanymen, prokýratýranyń narazylyqtarynan keıin eki úkimniń de kúshi joıylǵan.

Túrmeden shyǵaryp berem: Astanada 57 mln teńgeden astam aqsha alǵan alaıaqqa sot úkimi shyqty
Foto: Kazinform\JI

QAJK-niń 12 qyzmetkerine qatysty qylmystyq is Atbasar aýdandyq sotynda qaraldy. Bul joly olarǵa QR Qylmystyq kodeksiniń 362-babynyń 1-bóligi boıynsha laýazymdyq ókilettikterin asyra paıdalandy degen aıyp taǵyldy.

Sot «Qazaqstan Respýblıkasynyń jańa Konstıtýtsııasynyń qabyldanýyna baılanysty raqymshylyq jasaý týraly» zańdy qoldanyp, olardyń árqaısysyna bir jylǵa bas bostandyǵyn shekteý jazasyn taǵaıyndady. Sottalýshylar úsh jylǵa quqyq qorǵaý organdarynda, memlekettik qyzmette jáne jergilikti ózin-ózi basqarý organdarynda laýazym ıelený quqyǵynan aıyryldy. Sot olardy arnaýly ataqtarynan da aıyrdy. Sottalǵandarǵa probatsııalyq baqylaý belgilendi.

Úsh sottalýshy jazadan bosatyldy. Olar sot talqylaýy kezinde qamaýda bolǵandyqtan, jazasyn ótegen bolyp esepteldi.

Budan bólek, sottalǵandardyń árqaısysy jylyna 100 saǵat májbúrli eńbekke tartyldy.

Sot jábirlenýshilerdiń moraldyq zııandy óteý týraly azamattyq talaptaryn ishinara qanaǵattandyrdy. Sottalǵandardan ár jábirlenýshiniń paıdasyna 500 myń teńgeden 1,5 mln teńgege deıin ótemaqyny ortaqtasyp óndirip alý týraly sheshim shyǵaryldy.

Sot úkimi zańdy kúshine engen joq.

Eske salaıyq, 2023 jyly áleýmettik jelide Atbasar aýdanyndaǵy №1 túzeý mekemesiniń qyzmetkerleri dárethana tazalaýdan bas tartqan jazasyn óteýshini uryp-soqqan vıdeo taraǵan edi. QAJK júrgizgen qyzmettik tekserý qorytyndysy boıynsha tártiptik komıssııanyń sheshimimen Aqmola oblysy boıynsha Qylmystyq-atqarý júıesi departamentiniń bastyǵy, onyń orynbasary jáne kolonııa bastyǵy qyzmetinen bosatyldy.

2025 jylǵy aqpanda Aqmola oblysynda sottalǵandardy azaptady dep aıyptalǵan QAJK-niń 12 qyzmetkeri alqabılerdiń sheshimimen aqtaldy.

Alaıda prokýratýra aqtaý úkimine narazylyq bildirdi. Kóp uzamaı birinshi satydaǵy sot protsestik zań buzýshylyqtarǵa jol bergendikten, úkimniń kúshi joıyldy.

Keıin alqabıler QAJK-niń 12 qyzmetkerin ekinshi ret aqtady. Prokýratýra bul úkimge de narazylyq bildirdi. 

Oblystyq sot aqtaý úkiminiń kúshin joıyp, isti sol sottyń basqa quramyna qaıta qaraýǵa jiberdi.

Osydan keıin sottalýshylarǵa Qylmystyq kodekstiń basqa baby boıynsha aıyp taǵylǵany belgili boldy.

2026 jylǵy 4 mamyrda sot sheshimimen qylmystyq is Atbasar aýdandyq sotyna joldandy.