Atbasarda jaıaý júrginshiniń ólimine kináli polıtseı eki aıǵa qamaýǵa alyndy

KÓKShETAÝ. KAZINFORM – Aqmola oblysynyń Atbasar qalasynda jaıaý júrginshini qaǵyp, mert qylǵan polıtsııa qyzmetkeri sottyń sanktsııasymen eki aıǵa qamaýǵa alyndy.

Aqmola oblysy soty baspasóz qyzmetiniń málimetinshe, 2024 jyldyń 19 tamyzynda Atbasar aýdandyq sotynyń qaýlysymen adam ólimine ákelip soqtyrǵan jol-kólik oqıǵasyna kináli er adamǵa qatysty 2 aı merzimge «qamaýda ustaý» túrindegi bultartpaý sharasyna sanktsııa berildi.

Qylmystyq qýdalaý organy er adamdy aýyr zardaptarǵa-adamnyń ólimine jáne jábirlenýshiniń densaýlyǵyna zııan keltirýge ákep soqqan jol-kólik oqıǵasyna qatysty quqyqbuzýshylyq jasady dep kúdikke alyp otyr. Sonymen birge kúdiktiniń jol-kólik oqıǵasyn jasaǵannan keıin jábirlenýshilerge kómek kórsetpeı, qylmys ornynan qashyp ketkeni anyqtaldy (QK 345-babynyń 3-bóligi, 347-baby).

Ol osyǵan deıinde, ıaǵnı 2024 jylǵy 16 tamyzda jyldamdyqty shamadan tys asyrǵany úshin ákimshilik jaýapqa tartylǵan(QR ÁQbK 592-babynyń 1-bóligi).

«Sol sebepti, sot kúdikti bostandyqta bola otyryp, kýágerlerge áser etý arqyly isti obektıvti tergeýge kedergi keltiredi, qylmystyq qýdalaý organdary men sottan jasyrynýy múmkin dep sanaıdy. Sot sheshimi zańdy kúshine engen joq», - dedi Aqmola oblystyq soty baspasóz qyzmetinen.

Aıta ketsek, budan buryn Atbasarda polıtsııa qyzmetkeri jaıaý júrginshini qaǵyp, mert qyldy.