Atbasarda tájik-aýǵan shekarasynda qaza tapqan 17 jaýyngerge arnalǵan memorıal ashyldy
ASTANA. KAZINFORM – Aqmola oblysynyń Atbasar qalasynda, QR ІІM Ulttyq ulanynyń 5510 áskerı bóliminiń 4-shi jeke atqyshtar rotasynda 1995 jylǵy 7 sáýirde Tájik-aýǵan shekarasynda qyzmettik boryshyn oryndaý kezinde qaza tapqan 17 áskerı qyzmetshige arnalǵan memorıaldyń saltanatty ashylý rásimi ótti.
Іs-sharaǵa 5510 áskerı bóliminiń qolbasshylyǵy, jergilikti atqarýshy organdardyń ókilderi, quqyqtyq tártip áskerleriniń ardagerleri men bólimniń jeke quramy qatysty.
Memorıal beıbitshilik pen turaqtylyq úshin ómir syılaǵan, Otan aldyndaǵy áskerı boryshyn adal atqarǵan batyrlardyń máńgilik beınesiniń belgisindeı. Ol bolashaq urpaq úshin batyldyq pen adaldyqtyń úlgisi retinde qyzmet etpek.
Saltanatty rásim barysynda jınalǵan qaýym batyrlardy bir mınýt únsizdikpen eske alyp, memorıalǵa gúl shoqtaryn qoıdy.
Bıyl Іshki áskerdiń batyrlarynyń erligine 30 jyl toldy.
Buǵan deıin Astanadaǵy Erlik alleıasynda «Er esimi – el esinde» eskertkishine gúl shoqtaryn qoıý rásimi ótken bolatyn. Memorıaldyń ashylýy Ulttyq ulannyń jaýyngerlik dástúrlerin saqtaýdaǵy jáne áskerı-patrıottyq tárbıeni nyǵaıtýdaǵy mańyzdy qadam boldy.
Aıta keteıik, Maıqaıyń altyn kenishinde qaza tapqan tórt qutqarýshynyń rýhyna memorıaldyq keshen ashyldy.