Atbasarda sýdyń deńgeıi tómendeı bastady
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker Atbasardaǵy jaǵdaı týraly aıtyp berdi, dep xabarlaıdy QazAqparat tilshisi.
«Atbasar jaqta biz sý deńgeıiniń tómendegenin baıqap otyrmyz. Avtomobıl kópirindegi kórsetkishke sáıkes, bir táýliktiń ishinde sýdyń deńgeıi 25 santımetrge tómendedi. Keshe ǵana 3 metr 50 santımetr bolǵan. Búgin saǵat 14:00-de sýdyń deńgeıi 3 metr 25 santımetrge deıin tústi. Ol shekti kórsetkishten 20 santımetrge tómen. Sondyqtan Atbasar jaqta sý tasqynynyń qaýipi tómendeı bastady deýge bolady», - dedi V.Bekker elordada ótken baspasóz máslıxatynda.
Aıta keteıik, búgingi brıfıngte komıtet basshysy elordaǵa jaqyn Qosshy aýylyndaǵy aýyz sý máselesin túsindirdi.
«Ol jaqta aýyz sý jınaqtaıtyn eki qondyrǵy bar. Bireýinde 6 uńǵyma, atalǵan qondyrǵy jumys istep tur. Oǵan qosa, taǵy bir qondyrǵyny salý jumystary bastalǵan bolatyn. Onda 14 uńǵyma bar. Dál osy qondyrǵynyń 9 uńǵymasyn sý basyp qaldy. Olardyń bári istemeı tur, qalǵany durys. Negizi, ol qondyrǵynyń qurylysy áli aıaqtalǵan joq. Resmı túrde paıdalanýǵa da berilmedi. Alaıda ol jerden aýyz sý turǵyn úılerge berilip turady», - deıdi V.Bekker elordada ótken baspasóz máslıxatynda.
Onyń aıtýynsha, tártip boıynsha jańa sý qondyrǵysynyń aınalasyn topyraqpen úıip tastaý qajet. Sonda ishine sý kirmeıdi. Biraq ondaı sharalar atqarylǵan joq.
«Negizi, qazir Qosshyda sý bar. Maǵan solaı baıandady. Biraq turǵyn úılerde aýyz sý joǵary qabattarǵa jetpeı jatyr. Qysym az, sol jaǵynan qıyndyq bar. 4-5 qabattarǵa jetpeı jatyr dedi», - dep atap kórsetti V.Bekker.
Komıtet basshysy Qazgıdromettiń aldaǵy boljamyna alańdap otyrǵanyn da jasyrmady.
Al Pavlodar oblysynda respýblıkalyq mańyzy bar joldy qalpyna keltirdi.
