Atbasarda sý tasqynynan zardap shekkenderge jańa páterler beriledi
Eske sala keteıik, bıylǵy kóktemdegi sý tasqynynyń saldarynan Atbasar aýdanynda 650-den astam nysan sýda qalǵan bolatyn. Onyń ishinde Atbasar qalasynda 644 turǵyn úı, №1 orta mektep, qala syrtyndaǵy «Esil» saýyqtyrý kesheni jáne kólik kommýnıkatsııasy bar.
Júrgizilgen tekseris barysynda arnaıy komıssııa sarapshylary 467 turǵyn úıdi apatty dep tanydy. Onyń 36-sy buzylǵan bolsa, 168-in jóndeý qajet. Qazir sarapshylar turǵyndarǵa zertteý aktisin taratýda. Keıin turǵyn úıler qurylysyn júrgizýge jáne sý alǵan turǵyn úılerdi jóndeýge qomaqty qarjy bólinbek. Jańa turǵyn úılerdiń qurylysy maýsym aıynda bastalady dep josparlanǵan. Sý tasqynynan zardap shekken aýdan turǵyndaryna «Taza qala» qoǵamdyq birlestiginiń qorynan qarjylaı kómek kórsetilýde. Bul qordan baspanasyz qalǵan turǵyndardyń páter jaldaý aqysy tólenýde.
Qala ákiminiń aıtýynsha, sý tasqynynyń zardabyn joıý maqsatyna 321 mıllıon 665 myń teńge bólingen. Bul qarjyǵa 45 páterlik on eki turǵyn úı, modýldik bý qazandyǵy jáne ınfraqurylym qurylysynyń jobalyq smetalyq qujattamalary jasalýda. Osy qarjydan turǵyn úılerdiń jaǵdaıyn baǵalaǵan sarapshylardyń eńbekaqysy da tólengen.
«Qazir ınfraqurylymdar men joldar jóndelip jatyr. №1 orta mektep pen «Esil» saýyqtyrý kesheniniń ǵımaratyn kúrdeli jóndeýdiń jobalyq-smetalyq qujattamasy jasaldy. Bul jumystarǵa qarjy bólý úshin bıýdjetke ótinim jasalady. Sarapshylar aýdan ortalyǵyndaǵy 367 turǵyn úıdi apatty jaǵdaıda dep baǵalady. Turǵyn úıler jańa shaǵyn aýdanǵa salynady. Bul úılerge sý tasqynynan zardap shekken qala men selolyq okrýgterdiń turǵyndary kezeń-kezeńmen bir jyldyń ishinde qonystandyrylady dep josparlanýda. Ázirshe baspanasyz qalǵan turǵyndarǵa arnaıy qordan páter jaldaý aqysy tólenýde», - deıdi qala ákimi.
Jalpy «Taza qala» qoǵamdyq birlestiginiń esep-shotyna 18 mıllıon 269 myń teńge túsken. Birlestiktiń ókili Nadejda Raıleniń sózine qaraǵanda páter jaldaýdyń 218 kelisimsharty jasalynyp,124 kelisimsharttyń tólemaqysy tólengen. Sý tasqynynan zardap shekkenderdiń bárine 11 mıllıon teńgege baǵalanǵan qaıyrymdylyq kómek kórsetildi.