Atbasarda sý tasqynyna qarsy shtab jumys isteýde
KÓKShETAÝ. QazAqparat - Aqmola oblysynyń Atbasar aýdanynda sý tasqynyna qarsy shtab jumys isteýde. Aldyn alý sharalary táýlik boıy júrgizilýde, dep habarlaıdy QazAqparat tilshisi.
Aýdan ákimdiginiń deregi boıynsha, turǵyn úılerdi aralaý kezinde sý basý qaýipi bar aýmaqtarda ornalasqan úılerdegi adamdardyń sany men múlikteri anyqtaldy.
"Adamdardy, múlik jáne úı janýarlaryn evakýatsııalaý boıynsha qujattar ázirlendi. Osy qujatqa saı ýaqytsha turaq retinde Atbasar qalasyndaǵy № 3, 4, 5, 7 jáne 8 orta mektepteri tańdalyp alyndy.
Al, materıaldyq qundylyqtar «Bas» JK jáne «Tselındorstroı» JShS aýmaǵynda ornalastyrylatyn bolady. Jedel top táýlik boıy kezekshilik júrgizýde", deıdi ákimdiktegiler
Sý basý qaýipi bar aýmaqtarda ornalasqan ár úıge uıymdar, aýdandyq ákimdik qyzmetkerleri jáne tehnıka bekitilgen. Olar turǵyndarmen táýlik boıy baılanysta.
"Uıymdar men kásiporyndardyń 135 qyzmetkerinen quralǵan 4 jedel otrıad qurylyp, olar júk kóligi jáne sý sorǵysh tehnıkalarmen jaraqtalǵan. Jedel otrıad naýryzdyń 18-nen bastap jumys isteýde.
Búgingi tańda, Atbasar aýdanyna Aqmola oblysynyń Tótenshe jaǵdaılar departamentiniń kúshteri taratylýda. Barlyǵy 23 qutqarýshy, 7 arnaıy tehnıka, 5 júzý quraly jáne 4 motopompa jetkizildi.
Turǵyndar úılerine sýdyń kelgendigi týraly Atbasar aýdandyq TJ bólimine jáne aýdandyq sý tasqynyna qarsy shtabqa: 2-48-55, 2-43-43, 2-42-27, 8-705-598-45-25 telefon baılanysy arqyly habarlaı alady", dep tolyqtyrdy Atbasar aýdany ákimdigindegiler.
