Atbasarda sý tasqynan zardap shekkender páterli boldy
KÓKShETAÝ. QazAqparat - Elordanyń 20 jyldyǵy qarsańynda Aqmola oblysynyń Atbasar qalasynda kóktemgi sý tasqynynan zardap shekkenderge 45 páterli eki turǵyn úıden páter kiltteri tapsyryldy, dep habarlaıdy QazAqparat tilshisi.
Aýdandyq mádenıet úıinde uıymdastyrylǵan saltanatty sharaǵa aýdan ákimi Amanbek Qaljanov qatysyp, baspanaly bolǵan jerlesterin qýanyshtarymen quttyqtady.
«Biz sizderdiń aýyrtpalyqtaryńyzdy jaqsy bilemiz. Kóp jyl turyp kelgen baspanadan bir sátte aıyrylý, páterde turý ońaı emes. Ótken jyly bastalǵan qurylys endi ǵana bitti. Biz sizderdi árdaıym qoldap, barlyq jaǵdaıdy aıtyp otyrdyq. Iá, osy alty 45 páterlik úıdi salý, paıdalanýǵa berý ońaı bolmady, degenmen, búgin, elordanyń 20 jyldyǵy qarsańynda sizderdi qýantyp otyrmyz. Búgin jańa baspanalaryńyzǵa kiresizder. Kórińizder, egerde olqylyqtar bolsa aıtasyzdar, merdiger kásiporyn osynda, olar jóndeıdi», - dedi aýdan ákimi.
Onyń aıtýynsha, qalǵan bes turǵyn úıdiń qurylysy bastalyp ketken. Oǵan tıisti qarajat bólinip, eki merdiger kásiporyn jumysty júrgizip jatyr. Jańa turǵyn úıler qys túskenshe bitýi kerek. Al qurylys jumystary aýdandyq ákimdiktiń kúndelikti baqylaýynda.
Sonymen qatar, sharada jańa baspana ıelerin aýdandyq máslıhat hatshysy Baǵdat Borumbaev, soǵys jáne eńbek ardagerleri keńesiniń tóraǵasy Ivan Komıssarov, qurylys bóliminiń basshysy Galına Moroz quttyqtap, jyly lebizderin bildirdi.
Baspanaly bolǵandardyń arasynda Tólegen Báımenov bar. Onyń otbasynda 3 balasy men nemeresi bar eken. «Árıne, qýanyshtymyz. Jańa úı salýǵa qarajat bólgen memleket basshylaryna alǵysymyzdy bildiremin. Biz 3 bólmeli páter kiltin aldyq, barlyq kórshilerime qonystaryń qutty bolsyn deımin», - dedi ol.
Dvornıkovter otbasy da qýanyshtary qoıyndaryna syıǵyza almaýda. Valentına Egorovna men Mıhaıl jańa páterdiń kiltiń qyzy, jıenimen alýǵa kelipti.
Ótken jyly Atbasar aýdanynda 549 úı kóktemgi tasqynda sý astynda qaldy. Jabaı ózeni jaǵalaýyndaǵy turǵyndardy qaýipti aımaqtan shyǵarý maqsatynda on bir 45 páterlik turǵyn úı salý josparlanǵan. Búgin sol úıdiń ekeýi paıdalanýǵa berilip, turǵyndar qonys toıyn toılaýda.
