Atbasarda sý basý qaýpi bar aýmaqtardaǵy úıler kóshirilýi múmkin
KÓKShETAÝ. QazAqparat - Atbasar qalasynda kóktemgi sý tasqynynan zardap shekken aýdan turǵyndarynyń qatysýymen qoǵamdyq tyńdaý ótti, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
«Nur Otan» partııasynyń aýdandyq fılıaly ǵımaratynda ótken kezdesýde kóktemgi sý tasqynynyń aldyn alý, keltirilgen materıaldyq shyǵyn sııaqty zardaptaryn joıý máselesi keńinen sóz boldy.
Eske sala keteıik, sońǵy jyldary (2014 jyldan beri) Atbasar qalasyndaǵy Jabaı ózeniniń boıynda ornalasqan úıler kóktem aılarynda tasqyn sýdan zardap shegip, turǵyndar biraz qıyndyq kórip keledi. Tabıǵat apaty materıaldyq shyǵyn ákelip qana qoımaı, orny tolmas moraldyq zııan keltirýde.
Ásirese, sońǵy eki-úsh jyl qatarynan oryn alǵan sý tasqynyń zardaby orasan zor boldy. Sý tasqynyn boldyrmaý úshin uzyndyǵy 9,5 shaqyrym berik bóget salýǵa 9 mıllıard teńgege jýyq qarjy qajet. Onyń ózi tek 3-4 jyldyń ishinde salynyp bitedi. Sondyqtan, aýdan turǵyndary bógetten góri, jańa turǵyn úıler salyp, qaýipsiz jerge birjolata kóshken durys dep otyr. Bul bir jaǵynan ýaqytty ári 1,5 - 2 mıllıard teńge qarjyny únemdeýge kómektesedi. Al, únemdelgen bul qarjyǵa Jabaı ózeniniń jaǵasyndaǵy turǵyn úılerdiń ornyn abattandyryp, eresekter men balalardyń demalatyn jaǵajaı aýmaǵyna aınaldyrýǵa bolady. Bul sharalar kóktem aılarynda sý tasqyny problemasyn túbegeıli sheship, ózen aǵysyn keńeıtýge múmkindik bereri anyq.
Jalpy, aýdan ákimdiginde jańa shaǵynaýdannyń jobasy qarastyrylǵan. Qazirdiń ózinde munda 45 páterli turǵyn úıdiń qurylysy júrgizilýde. Eger tasqyn sý qaýipi bar aımaqta ornalasqan ózge turǵyn úıler kóshiriletin bolsa, taǵy birneshe turǵyn úı jańadan salynar edi. Osylaısha, qazirgi zamanǵa saı turǵyn úıler men áleýmettik nysandary bar jańa shaǵynaýdan salý arqyly qalanyń kelbeti ajarlana túsetini sózsiz.
