Atbasarda sý basatyn úılerdiń turǵyndary basqa jerge kóshirilýi múmkin
ASTANA. QazAqparat - Atbasarda sý basýy múmkin jerdiń turǵyndaryna qalanyń basqa aýmaǵynan baspana usyný josparlanyp otyr. Bul týraly Senatta sý qaýipsizdigi taqyrybyna arnalǵan kezdesýde Aqmola oblysy ákiminiń orynbasary Vasılıı Krylov málim etti, dep habarlaıdy QazAqparat.
«Biz tıisti zertteýlerdi júrgizip, sý basý qaýpi bar aýmaqtyń qaýipsizdik pasporttaryn qurdyq. Osy oraıda bul aýmaqta 1830 turǵynymen 528 úı qalyp otyr. Bul aýmaqtaǵy jaǵdaı qandaı? Birinshi kezekte osyndaǵy aýrýǵa shaldyǵý deńgeıine zerdeledik. 85 adam týberkýlez boıynsha esepte tur, 63 adam demikpege shaldyqqan. Osy aýmaqta turyp balalardyń kóbisi demikpeden zardap shegedi. Turǵyndarmen kezdesý barysynda densaýlyq jaǵdaılary men múliktiń zaqymdanýyna qatysty másele jıi kóteriledi»,- dedi Krylov.
Onyń sózine qaraǵanda, turǵyndar men qoǵam tarapynan bul jaǵdaıdy sheshýde bóget qurylysynan bólek, balamaly usynys jasaldy. Bul usynys ákimdikpen birge qarastyrylǵan.
«Osy oraıda sý basýy múmkin jerden turǵyndardy qalanyń basqa aýmaǵyna kóshirý eskerilip otyr. Sonymen qatar Jabaı ózeniniń jaǵasyn nyǵaıtý sharalary da qamtylmaq. Bul usynys negizinen qoǵamdastyq tarapynan qoldaýǵa ıe boldy», - dep túsindirdi ol.
Ákim orynbasarynyń aıtýynsha, birinshi usynys boıynsha bóget qurylysy men ózen arnasyn tereńdetý jumystaryna 12 mlrd teńge somasynda qarjy qajet bolady. Al ekinshi usynys aıasynda úılerdiń (45 páterlik 12 úı men ınjenerlik-kommýnıkatsııalyq jelilerdi tartý) qurylysy 5 mlrd teńgeni quraıtyn bolady. Buǵan qosa, ózen arnasyn tereńdetýge 2 mlrd teńgege tarta qarjy jumsalmaq. Bul turǵyda 5 mlrd teńge únemdeledi.
Belgili bolǵandaı, atalǵan 528 jeke úıdiń ıeleri arasynda saýalnama júrgizilgen. Olardyń arasynda 75 paıyzy kóshýge daıyn ekenin aıtqan, al 25 paıyzy memlekettik organdardyń tıisti sheshimin kútip otyr.
Foto: Nurzhan Baimuldin/ Facebook
