Atbasarda Sibir jarasynan eki aýyl karantınge jabyldy

ASTANA. KAZINFORM — Aqmola oblysy Atbasar aýdanyna qarasty eki eldi mekennen Sibir jarasy anyqtalyp, aýyldar karantınge jabyldy. Bul týraly Aýyl sharýashylyǵy mınıstri Aıdarbek Saparov málim etti.

— Karantın zerthanalyq synama alyp, onyń qorytyndysy naqtylaǵannan keıin engiziledi. Oǵan deıin shekteý sharasy qabyldanady. Biz shekteý sharasyn qabyldadyq, buǵan deıin karantın qabyldanǵan joq. Aýmaqty qorshap, shlagbaým qoıyldy. Respýblıkalyq epızootııalyq jasaq dezınfektsııadan bastap, óńdeý, joıý jumysyn júrgizdi. Zerthana nátıjeleri týraly qorytyndy alǵannan keıin, biz dereý 1 shildede karantın engizdik, — dedi Aıdarbek Saparov Úkimet otyrysynan keıin ótken baspasóz máslıhatynda.

Mınıstrdiń málimdeýinshe, karantın 15 kúnge sozylady.

— Odan keıin taǵy da topyraqtan jáne basqa da nysandardan synama alynyp, tıisti jumys júrgiziledi, eger nátıje teris bolsa, karantın toqtatylady. Іndetti 19 adam juqtyrdy, bir adam aýyr halde, qalǵandarynyń jaǵdaıy ortasha aýyr. Barlyq adam dárigerlerdiń baqylaýynda, jaǵdaıy jaqsaryp keledi. Densaýlyq saqtaý salasy bul máseleni baqylaýda ustap otyr, — dep tolyqtyrdy vedomstvo basshysy.

Eske salsaq, bıyl 30 maýsymda Aqmola oblysynda sibir jarasynyń terige shyǵatyn túri tirkeldi.