Atbasarda polıtsııa qyzmetkeri jaıaý júrginshini qaǵyp, mert qyldy

KÓKShETAÝ. KAZINFORM – Aqmola oblysynyń Atbasar qalasynda polıtsııa qyzmetkeri jaıaý júrginshini qaǵyp, mert qyldy. Polıtsııa is qozǵady.

Aqmola oblysy PD baspasóz qyzmetiniń málimetinshe, jol-kólik oqıǵasy tamyzdyń 18-de túngi saǵat 02:50 shamasynda bolǵan.

«Atbasar qalasynda jaıaý adamdy kólik qaǵyp ketti, ol alǵan dene jaraqatynan kóz jumdy. Osy oqıǵaǵa qatysy bar júrgizýshi ustalyp, ýaqytsha ustaý oqshaýlaǵyshyna qamaldy», - dedi vedomstvodan.

Áleýmettik jelide taraǵan jazbada kúdikti 2013 jyldan beri polıtsııa qyzmetkeri bolyp jumys istegen.

PD baspasóz qyzmetinen kináli júrgizýshiniń polıtsııa qyzmetkeri bolyp istegenin rastap otyr.

«Qazirgi ýaqytta ol teris sebeptermen ishki ister organdarynan jumystan shyǵaryldy. Barlyq qajetti saraptamalar taǵaıyndaldy jáne tergeý barysy Aqmola oblysy PD basshylyǵynyń baqylaýynda», - dep tolyqtyrdy vedomstvodan.

Aıta ketsek, budan buryn «Jezqazǵan – Petropavl» tas jolynda adam qaǵyp, mert qylǵan júrgizýshi ustalǵanyn jazǵan edik.