Atbasarda oqýshynyń toqqa túsýi: Mektep dırektory qyzmetinen ketti
KÓKShETAÝ. QazAqparat - Aqmola oblysy Atbasarda aýdanynda oqýshy balanyń toqqa túsýi oqıǵasyna baılanysty Marınovka orta mektebiniń dırektory óz erkimen qyzmetinen ketti, dep habarlaıdy QazAqparat tilshisi.
"Osy oqıǵadan keıin men mektep dırektoryna sógis jarııaladym. Keıin ol sáýirdiń 15-de ótinish jazyp óz erkimen dırektorlyq qyzmetinen ketti. Biraq mektepte muǵalim bolyp odan ári jumys isteı beredi", dep málim etti QazAqparat tilshisiniń saýalyna Atbasar aýdandyq bilim bóliminiń basshysy Natalıa Naımýshına.
Onyń aıtýynsha, qazirgi kezde mektep dırektorynyń mindetin oqý isi jónindegi orynbasary atqaryp júr.
Eske sala keteıik, osyǵan deıin habarlaǵanymyzdaı, qaıǵyly oqıǵa Irchenko temir jol stansasynda oryn alǵan bolatyn. 2019 jylǵy sáýirdiń 11-de shamamen saǵat 16:00-de Marınovka orta mektebiniń 8-synyp oqýshysy 15 jastaǵy ul bala poıyzdyń astyq tıegish vagonyna shyǵady. Vagonda oǵan joǵary kerneýli elektr symynan tok soǵyp, kóz jumady. Al, onyń qasynda bolǵan bala Atbasar aýdanaralyq kópbeıindi aýrýhanasynyń travmatologııa bólimshesine jetkiziledi. Qazirgi kezde bul balanyń jaǵdaıy qanaǵattanarlyq.
Osy oqıǵaǵa baılanysty quqyq qorǵaý organdary QR QK 344-babynyń 2 bóligi (temirjol kóligin paıdalaný nemese qozǵalys qaýipsizdigi erejesin buzý) boıynsha is qozǵap, sotqa deıingi tergeý amaldaryn júrgizýde.
