Atbasarda ekologııalyq taza suly qaýyzyn óndiretin zaýyt salynady
KÓKShETAÝ. QazAqparat - Aqmola oblysynyń Atbasar aýdanynda ekologııalyq taza suly qaýyzyn óndiretin zaýyt salynady. Bul týraly QazAqparat tilshisine «Zarechnyı» JShS basshysy Ýálıhan Áripov aıtty.
Jobany Elbasynyń «Qazaqstandyqtardyń ál-aýqatynyń ósýi: Tabys pen turmys sapasyn arttyrý» atty Joldaýyndaǵy mindetterdi júzege asyrý sheńberinde Atbasar aýdanynyń Pokrovka aýylynda «Zarechnyı» JShS holdıngine kiretin «Baha-Söhne» JShS qolǵa almaq.
«Jobanyń quny qurylys-montajdaý jumystaryn esepke almaǵanda 1 mıllıard teńgeni qurap otyr. Barlyq daqyldardy tereń óńdeıtin mundaı zaýytty shveıtsarııanyń Bühler kompanııasy jasaıdy. Biz ónim retinde sulyny tańdap otyrmyz. Búgingi kúni naryqta sulyǵa degen suranys joǵary. Sonymen birge, suly bizdiń óńirde jaqsy ósedi. Qazirgi kezde, dúkenderdegi suly qaýyzy reseıden jetkiziledi. Al, biz shyǵaratyn suly qaýyzy joǵary sapaly jáne ekologııalyq taza bolady», - deıdi Ý.Áripov.
«Zarechnyı» JShS basshysynyń aıtýynsha, kásiporynnyń quryltaıshysy jáne bas dırektory onyń kishi uly Amanjol Áripov. Aldaǵy ýaqytta suly qaýyzyn óndiretin zaýyt ǵana emes, jem-azyq alańyn salý josparda bar. Bul óz kezeginde qaldyqsyz jumys isteýge múmkindik bermek.
«Sulyny tereń óńdeý tehnologııasy arqyly 1 tonna ónimnen 40 paıyz qaldyq alynady. Budan bólek, biz 1000 bas iri qaraǵa arnalǵan mal bordaqylaý alańyn ashamyz. Bastapqy kezde 400 bas iri qaraǵa josparlap otyrmyz. Eger jylyna 10 myń tonna suly óńdesek, onda bizde 4 myń tonna qaldyq qalady. Biz muny mal bordaqylaǵanda qoldanatyn bolamyz. Pokrovka aýylymen irgeles Borısovka jáne Poltavka aýyldary ornalasqan. Bul aýyldardyń árbireýinde 1000-nan astam adam bar. Turǵyndardan jas tól satyp alyp, ony bordaqylaıtyn bolamyz. Keıin onda sımmental jáne angýs sıyrlaryn ósirý josparda bar. Ol úshin bizge mal azyǵyn jasap alý qajet», - deıdi Ý.Áripov.
Qazirgi zamanǵa saı jabdyqtalǵan zaýytta barlyq jumystar kompıýterlendirilgen bolady. Jospar boıynsha zaýyttyń qýaty saǵatyna 2 tonnany quraıdy.
«Jumys ýaqytyn 7 saǵat dep alǵanda, eki aýysymda jumys istegen jetkilikti. Zaýyt ashylǵan kezde 20 adamdy jumyspen qamtý kózdelgen», - dep tolyqtyrdy Ý.Áripov.
Qazirgi kezde, zaýyt qurylysy júrgiziletin jer telimindegi jumystar bastaldy. Aldaǵy bir-eki jyldyń ishinde qurylys jumystaryn aıaqtaý josparda bar. Zaýyt tolyq qýatyna shyqqan kezde ımport úlesin azaıtýǵa múmkindik bermek.
«Árıne, biz eń bastysy ishki naryqtaǵy suranysqa jumys isteıtin bolamyz, artylyp jatsa eksportqa shyǵaramyz», - dep túıindedi Ý.Áripov.
Avtor: Oksana Matasova
