Atbasarda bala dop oınap júrip aýrýhanaǵa tústi

ASTANA. KAZINFORM – Aqmola oblysynyń Atbasar qalasynda qatty jel turyp dop oınap júrgen bala fýtbol alańynyń jasandy tósenishine bastyrylyp qalǵan. Oqıǵanyń vıdeosy áleýmettik jelide tarady.

Atbasar aýdanynyń ákimdigi qatty jel kesirinen shaǵyn aýdandaǵy fýtbol alańynyń jasanly tósenishin jel qoparǵanyn málim etti. 

— Alańda 17.11.2013 jyly týǵan bala oınap júrgen. Jasandy tósenishti bir bóligi ony basyp qalǵan. Ony birden aýdandyq aýrýhana jetkizdi. Denesinde jaraqattar bar, jaǵdaıy turaqty. Travmatologııa bólimshesinde dárigerlerdiń baqylaýynda jatyr, — dep málim etti ákimdiktegiler.

Ákimdik ókilderi aıaqtyń astynda jatý kerek tósenish nege jelge tushyp júrgenin túsindirdi. 

— Áýel basta josparymyz boıynsha ol jerde qarapaıym oıyn alańy túsý kerek bolǵan. Jańa merdiger alańdy jaqsylap jabdyqtap, tolyqtaı jasandy tósenish salyp shyqqan. Bálkim oıynnan jabynnyń sheti mújilgen shyǵar, sonyń saldarynan jel kóterip ketse kerek. Qurylys bólimi oıyn alańyn qalpyna keltiredi, — dep habarlady ákimdiktiń baspasóz qyzmeti.

Buǵan deıin Aqmola oblysynda 5 jasar balaǵa izdeý jarııalanǵan edi.