Atbasar turǵyndary jylý aqysyn 5 ese qymbat tólep kelgen - prokýratýra

KÓKShETAÝ. QazAqparat - Atbasar aýdanynyń prokýratýrasy jylý energııasyn paıdalaný qyzmeti úshin tutynýshylardan negizsiz artyq tólem alý deregin anyqtady, dep habarlaıdy QazAqparat tilshisi.

Aqmola oblystyq prokýratýrasy baspasóz qyzmetiniń málimetinshe, prokýratýra qyzmetkerleri júrgizgen monıtorıng barysynda osy jyldyń aqpan aıynan bastap qazirgi ýaqytqa deıin Atbasar qalasyndaǵy №1-shaǵynaýdanynyń 1-kvartalynda ornalasqan №2 úıdegi (45 páter) jylý energııasyn esepteý quraldarynyń isten shyqqandyǵy anyqtaldy.

«QR zańnamasynda tutynýshyda kommertsııalyq esepke alý aspaptary bolmaǵan kezde kórsetilgen qyzmetter kólemi esep aıyrysý jolymen aıqyndalady dep belgilengen. Bul rette, naýryz aıynan mamyr aıyna deıin «Atbasar Sý» kommýnaldyq kásiporny jylý eseptegishiniń aqaýlyǵyna baılanysty, Atbasar qalasyndaǵy №1-shaǵynaýdanynyń 1-kvartalynda ornalasqan №2 úıdiń turǵyndaryna ár aı úshin esep aıyrysý jolymen jylý úshin shottardy zańsyz shyǵarǵan. Sonyń saldaryna kólemi birdeı turǵyn úıdiń tutynýshylary jylý aqysyn 5 ese qymbat tólegen. Osyǵan baılanysty qadaǵalaý aktisi engizilip, kináli laýazymdy tulǵalar tártiptik jaýapqa tartyldy. Búgingi kúni qaıta esepteý júrgizilip, 45 páter turǵyndarynyń artyq tólegen qarajaty aldaǵy jylytý maýsymyna esepke alynatyn bolady», - dedi vedomstvodan.

Aıta ketsek, Búgingi tańda Atbasar qalasy boıynsha turǵyn úılerde 122 jylý jáne 8 133 sý esepteý quraldary ornatylǵan. Tutynýshylarǵa jylý energııasyn berýdi energııamen jabdyqtaýshy uıym jylýmen jabdyqtaýǵa arnalǵan jarııa shartqa sáıkes júzege asyrady. Óz kezeginde tutynýshy jylý energııasy úshin energııamen jabdyqtaýshy uıymmen kommertsııalyq esepke alý quraldary boıynsha eseptesedi.

Eske sala ketsek, budan buryn Aqmola oblysynda dári-dármekterdi retseptisiz bosatqan 12 farmatsevt jaýapqa tartylǵan edi.