Atbasar qalasynyń ortalyq kóshesine Qanaı bı esimi berildi
Vedomstvonyń málimeti boıynsha, Atbasar qalasyndaǵy ortalyq kóshege XVIII ǵasyrdaǵy Qazaqstannyń qoǵam jáne memleket qaıratkeri Qanaı bı esiminiń berilýine oraı saltanatty shara ótip, oǵan aýdan jáne Atbasar qalasynyń turǵyndary, Aqmola oblystyq sotynyń, aýdandyq jáne qalalyq ákimdikter, oblystyq jáne aýdandyq maslıhat, quqyq qorǵaý organdarynyń basshylary, prokýratýra, jergilikti memlekettik mekemeler, bıznes qurylymdarynyń ókilderi, eńbek jáne sot júıesiniń ardagerleri, sonymen qatar, Qanaı bıdiń urpaqtary qatysty.
Sharada Aqmola oblystyq sotynyń tóraǵasy Dosjan Ámirov, oblystyq maslıhattyń depýtaty, Atbasar qalasynyń qurmetti azamaty Ajdar Taıshytaev, aýdandyq maslıhattyń hatshysy Baǵdat Borambaev, Kókshetaý qalalyq maslıhatynyń depýtaty, Aqmola oblysynyń kásipkerler odaǵynyń tóraǵasy Boranbaı Begalın, Aqmola oblysynyń ardager-sýdıalar keńesiniń tóraǵasy, otstavkadaǵy sýdıa Meıram Ǵıbádilov, Zerendi aýdanynyń mádenıet qaıratkeri - Qanaı bıdiń urpaǵy Sovethan Ekpin jáne basqa da qurmetti azamattar, bıdiń urpaqtary sóz sóıledi.
Aqmola oblystyq sotynyń tóraǵasy óz sózinde, Qazaq halqynyń birigýine jáne memlekettiń tutastyǵyn saqtaýǵa kóp eńbek etken qaıratkerlerdi óskeleń urpaq bilýi qajet ekenin atap ótti.
«Qanaı bı atyndaǵy kóshe qalanyń kelbetine aınalýy kerek. Sebebi, Qanaı bıdiń esimi danalyqty jáne turaqtylyqty beınelep, maqtanysh, kúsh pen erlikti sondaı-aq, birlikpen, myqty memleketti jáne ádil qoǵamdy aıshyqtap turady» - dedi Dosjan Ámirov.
Sonymen qatar, sot tóraǵasy sýdıalar qaýymdastyǵy men jergilikti atqarýshy organdardyń qazaq halqynyń bıleriniń esimderimen aýyl jáne kóshe ataýlaryn ózgertý boıynsha úles qosqan eńbekterin atap ótti. Búgingi tańda oblysymyzda 15 kóshe jáne 1 kentine qazaq bıleriniń esimi berilip, osy arqyly qazaq halqynyń tarıhy jańǵyrtyldy.
«Atalǵan jumys Qazaqstan Respýblıkasy Joǵarǵy Sotynyń basshylyǵymen Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynyń negizgi Qaǵıdalaryn júzege asyrý maqsatynda júrgizilýde» - dep tolyqtyrdy D.Ámirov.
Aıta keteıik, Qanaı bı Quttymbetuly - sheshen, batyr, Abylaıhannyń bas keńesshisi. Aqmola oblysynyń Zerendi aýdany aýmaǵynda týǵan. XVIII ǵasyrdaǵy orta júzdiń bedeldi kóshbasshysy, syrtqy jaýlarǵa qarsy ult-azattyq qozǵalystarǵa qatysýshy jáne uıymdastyrýshy, dańqty qolbasshy, qazaq jerlerinen jońǵarlardan azat etýge zor úles qosqan. Ol aqyldylyǵy jáne sheshendigimen erekshelenip, Abylaıhannyń bas keńesshisi bolǵan.
