Atbasar aýdanynyń burynǵy ákimine sot úkimi shyqty
«Sot úkimimen A.Nıkıshov QR QK 189-baby 4-bóliginiń 2 bólimshesi, 366-baby 3 bóliginiń 2,4 bólimsheleri, 58-babynyń 1,3,5 bólikteri boıynsha kináli dep tanylyp, 10 jylǵa bas bostandyǵynan aıyryldy. Ol jazasyn qylmystyq -atqarý júıesiniń ortasha qaýipsiz mekemesinde óteıtin bolady. Sonymen qatar, burynǵy ákim ómirboıyna memlekettik qyzmetterde jumys isteý quqyǵynan aıyryldy. Oǵan qosa, QR QK 49-babynyń 2-bóligi boıynsha QR Prezıdentine A.Nıkıshovty memlekettik nagradasy «Qurmet» ordeninen aıyrý týraly usynys jasady», - delingen sottyń habarlamasynda.
Sonymen qatar, Atbasar aýdandyq sot burynǵy aýdan ákiminiń sybaılastary K.Álimjanovty 7 jylǵa, A.Serkebaevty 8 jylǵa, M.Túrkestanovty 7 jylǵa bas bostandyǵynan aıyrý jazasyn taǵaıyndasa, D.Qonyshev 18 mıllıon teńge jáne R.Baphoev 60 mıllıon teńge kóleminde aıyppul tóleýge mindetteldi.
Eske sala keteıik, 2017 jyldyń 31 tamyzynda A.Nıkıshov pen A.Serkebaev Atbasar qalasynyń qazandyqtary men jylý magıstraldaryn jóndeý jumystarynyń qujattaryna qol qoıý jáne oǵan aqsha aýdarý úshin «IshımStroıInvest» JShS-niń dırektory Baphoevtan 4 mıllıon teńge kóleminde para alý kezinde qolǵa túsken bolatyn.