Atbasar aýdanynyń 9 eldi mekeninde sý tasqynyna qarsy jumystar júrgizildi
KÓKShETAÝ. QazAqparat - Aqmola oblysynyń Atbasar aýdanynda kóktemgi sý tasqynynyń qaýpi joǵary 9 eldi mekeninde tótenshe jaǵdaıdyń aldyn alý jumystary júrgizdi. Qaýpi joǵary óńirlerge Atbasar qalasy men Samarqa, A.Qurmanov, Poltavka, Pokrovka, Borısovka, Novoselskoe, Sadovoe, Shýıskoe aýyldary jatqyzylǵan, dep habarlaıdy QazAqparat tilshisi oblystyq Tótenshe jaǵdaılar departamentiniń baspasóz qyzmetine silteme jasap.
«Qazirgi kezde ózendegi muzdy jarý bastaldy. Ótken jylmen salystyrǵanda bıyl qar áldeqaıda kóp túsken. Eger byltyr qar jamylǵysy 25-30 sm bolsa, bıyl 40 sm asady», – deıdi Atbasar aýdanynyń ákimi Amanbek Qaljanov.
Atbasar aýdany boıynsha bıylǵy 11-14 naýryz aralyǵynda jalpy aýdany 2805 sharshy metr bolatyn 15 ýchaskede muz jarylyp, 187 kg jarǵysh qoldanylǵan.
Sý basý qaýpi bar aımaqta 502 turǵyn úı ornalasqan, onyń ishinde 269 úı Atbasar qalasynda, 233 úı aýyldyq eldi mekenderde tur. Jalpy Atbasar aýdanynda halyq sany 2000 adam bolatyn 16 eldi mekeni sý basýy múmkin aımaqqa ornalasqan. Osyǵan baılanysty atalmysh eldi mekenderde qar shyǵarylyp jatyr.
Aıta ketsek, kóktemdegi yqtımal tótenshe jaǵdaılar úshin Atbasar aýdanynda 373 adam, 129 ınjenerlik, sý sorǵysh jáne evakýatsııalyq arnaıy tehnıka, 16 motopompa, 6 júzý quraly tartylatyn bolady. Sonymen birge, Aqmola oblysy TJD jeke quramynan 64 adam, 14 birlik tehnıka, 3 birlik júzý quraldary jáne 8 birlik motopompa qarastyrylǵan.
