Atbasar aýdanynda sý tasqyny qaýpi seıilgen joq

KÓKShETAÝ. KAZINFORM — Aqmola oblysy Atbasar aýdanynda tótenshe jaǵdaı jarııalandy. Mundaǵy Jabaı ózeniniń deńgeıi 6.10 metrge deıin kóterilip, 127 jer úı sý astynda qaldy. Budan bólek, eki mekteptiń jertólesine sý kirgen.

Búginde sý deńgeıi shamamen 5 metrge deıin tómendegen. Dese de, qaýiptiń beti seıilgen joq. Jabaı ózenine eki ózenniń sýy qosylady eken. Osylaısha, kúsh alǵan tasqyn jylda atbasarlyqtardy ábigerge salatyn kórinedi. Joıqyn tasqyn 2014, 2017 jyldary jáne bıyl tirkelip otyr.

Atbasar aýdanynyń ákimi Amanbek Qaljanovtyń aıtýynsha, búginde sý basqan úılerdiń turǵyndary arnaıy komısııaǵa qujattaryn tirkep jatyr. Keıin komıssııa músheleri úı-úıdi aralap, shyǵyn kólemin anyqtamaq.

«2017 jyly sý astynda qalǵan úılerdiń turǵyndaryn kóshirý maqsatynda 5 qabatty úıdiń qurylysy bastalǵan bolatyn. Búginde kópshiligi sonda turyp jatyr. Kóshýge nıet tanytpaǵan 87 úı ıeleri bıyl taǵy sý astynda qaldy. Kópqabatty úıge kóshkisi kelse, úıleri daıyn. Kóshpeımiz dese, úılerine jóndeý jumystaryn júrgizip beremiz», - deıdi aýdan basshysy.

Aıta keteıik, aýdanda 7 evakýtsııalyq pýnkt ashylǵan. Biraq, olardyń bári bos tur. Turǵyndar týystarynyń úıine barýdy jón dep tapqan.