Atbasar aýdanynda 2 myńnan astam turǵyn «Taza Qazaqstan» aktsııasyna úles qosty
KÓKShETAÝ. KAZINFORM - Atbasar aýdanynda kásiporyndar men uıymdardyń, sondaı-aq, áleýmettik nysandardyń jumysshylary jáne ózge de turǵyndardan quralǵan 2 myńnan astam adamnyń qatysýymen «Taza Qazaqstan» respýblıkalyq ekologııalyq aktsııasy ótti.
Atbasar qalasynyń ortalyq alańynda aýdan ákimi Amanbek Qaljanov aktsııaǵa qatysýshylardy qarsy aldy.
Aýdan ákiminiń aıtýynsha, Memleket basshysy Qasym-Jomart Toqaevtyń qoldaýymen elimizde 2024 jyldyń 6 sáýiri men 11 mamyry aralyǵynda «Taza Qazaqstan» respýblıkalyq ekologııalyq aktsııasy ótti. Bul aýqymdy ekologııalyq aktsııa bes aptaǵa sozyldy, olardyń árqaısysy belgili bir taqyrypqa arnaldy. Sáýirdiń 13-ne deıin ótkizilgen «Taza ólke» aptalyǵy barysynda aýmaqtar men turǵyn úı aýlalary tazartyldy. Odan keıingi «Kıeli meken» aptalyǵy tarıhı-mádenı eskertkishter aýmaǵyn abattandyrý jumystaryna arnaldy. «Jasyl aımaq» aptalyǵy aǵash kóshetterin otyrǵyzýmen, ekpelerdi aqtaýmen atap ótildi. Sol kezde, Atbasar aýdanynda barlyǵy 1613 aǵash otyrǵyzyldy. Al «Ónegeli urpaq» aptalyǵy ardagerler men qarttar úıleriniń aýmaǵy men aýlasy tazartylyp, abattandyryldy. Sońǵy «Móldir bulaq» aptalyǵy barysynda sý aıdyndary - ózen, kólderdiń jaǵasy kúl-qoqystan tazartyldy.
«Atbasar aýdanynda ótken «Taza Qazaqstan» respýblıkalyq ekologııalyq aktsııasy barysynda jergilikti turǵyndar belsendilik tanytty. Aýdan boıynsha barlyǵy 365 tonna kúl-qoqys jınaldy. Aýdan turǵyndaryn ekologııalyq aktsııaǵa qatysyp, týǵan ólkeniń tazalyǵyn saqtaýǵa úles qosylýǵa shaqyramyn. Birigip, qalamyzdy taza eteıik! - dedi aýdan basshysy Amanbek Qaljanov aktsııaǵa qatysýshylarmen kezdesýinde.
Aktsııa barysynda Atbasar qalasynyń jaǵajaı aýmaǵy, Esenberlın, Áýezov, Aǵybaı batyr tárizdi birqatar kósheleri qoqystan tazartylyp, abattandyryldy.
Qalanyń ortalyq alańynda kanadalyq raýshan gúli men sándik buta aǵashtary otyrǵyzyldy.
Aktsııaǵa Atbasar elektrovoz jóndeý zaýytynyń, «Atbasar sý» kommýnaldyq kásipornynyń, «Ajdar jáne K» vagon jóndeý kásipornynyń, memlekettik mekemelerdiń, bilim berý jáne densaýlyq saqtaý mekemeleriniń, kommýnaldyq qyzmetterdiń jumysshylary men aýdan turǵyndarynan quralǵan barlyǵy 2 myńnan astam adam qatysty.
Osy rette, Atbasar agrarlyq-ındýstrııalyq kolledjiniń ujymy men stýdentteri, Jastar resýrstyq ortalyǵynyń músheleri, eriktiler asa belsendilik tanytty.
Aıta ketsek, budan buryn «Taza Qazaqstan» aktsııasy barysynda Kókshetaý qalasynda 9 myńǵa jýyq aǵash otyrǵyzylǵanyn jazǵan edik.
