Aýyl turǵyny at baptap, tazy júgirtýdi jelide dáriptep júr
ORAL. KAZINFORM — Batys Qazaqstan oblysy Terekti aýdanynda turatyn memlekettik qyzmetshi Ulan Saıtmuhaev #Qazalemi heshtegimen qysqy kórinisterden birneshe vıdeo jarııalady.
Ulan Janbotaulynyń aıtýynsha, tabıǵat aıasy taza aýasymen qosa adamǵa erekshe kúsh-qýat beredi. Taýy bolsyn, dalasy bolsyn, toǵaı-nýy, ózen-kóli bolsyn, árqaısysynyń ózine tán jaratylysy bar.
— Tabıǵat aıasyndaǵy ań-qustardy, ósken ósimdikterdi tamashalaı júrip, sol tirshilikten ózińniń ishki dúnıeńe kerek qorekti alýǵa bolady. Árkim tabıǵatty óziniń túısigine qaraı qabyldaıdy. Soqqan jel terektegi japyraq, ósip turǵan shópti qozǵaǵanda, sol syldyr, gýildiń ózinen tirshiliktiń tynysyn sezinýge bolady. Jabaıy ań-qustyń ózine tán ómiri bolady. Ágarıkı tap kelse, sol jáı ǵana bir-eki mınýttyq sáttiń ózinen ǵıbrat alýǵa bolady. Ondaı kezdesýler maǵan únemi sáttilik ákeledi, — deıdi U.Saıtmuhaev.
Onyń sózine qaraǵanda, kishkentaı kezinen jylqy kórip ósken. Sondyqtan at baptap, tazy júgirtkendi jany súıedi.
— Jylqyny ustaǵan soń, janýardyń ýaqytymen shóp, jemi, sýyn berip, tıisti ekpelerin jasap, rejımin buzbaý kerek. Bala kezden boıǵa sińgen nárse, maldyń asty qurǵaq bolýy tıis. Mal tuıaǵynan jutaıdy degendi atalarymnan kóp estip óstik. Dala kezip, tazy júgirtip ketkende, bes, alty, jeti saǵatqa deıin júresiń. Neshe saǵat minsem, sonsha ýaqyt sýytamyn. Kún salqynda, qys mezgilinde terlep kelgen attyń erin sheship, ústine jabý jabyp, tizginin túrip, basyn joǵary baılap qańtaramyn. Tıisti ýaqytyna sáıkes sýyǵan soń otqa qoıamyn. Saǵat, saǵat jarym ottaǵan soń kún, túnine qaramastan sýǵaramyn. Sosyn tıisti mólsherdegi sulysyn beremin. Kúndelikti aýnatýy jáne bar. Jaz mezgili, kún jylyda aýyl syrtyndaǵy bógetterge shomyldyryp jýyndyryp ákelemin. Kir sabynmen kóbigin kópirtip, sýǵa túsiremin. Munyń bárine esh erinbeımin, — deıdi ol.
Terekti aýdanynda, Jaıyq boıynda tabıǵaty ásem jerler jeterlik. Terekti aýdandyq qazynashylyq basqarmasynyń basshysy U.Saıtmuhaev qolónermen de aınalysady. Qamshy órip, úıine kelgen qonaqtaryna syıǵa tartady.
— Demalysta shabyt týlasa, taspa tilip, tobylǵy túzetip, qamshy saptaǵandy táýir kóremin. Úıdegi jylqy, tazylarymmen dala jortqandy janym súıedi. Dos-jarandarmen tabıǵat aıasynda ot jaǵyp, samaýrynnan sháı ishkendi qalaımyn, — dedi U.Saıtmuhaev.
Eske sala keteıik, buǵan deıin tanymal akter ári prodıýser Nurlan Qoıanbaev Instagram jelisindegi paraqshasynda Qazaqstannyń Táýelsizdik kúnine oraı baıqaý uıymdastyrǵan bolatyn. Qatysýshylar óz aımaǵyndaǵy qys kelbetin jáne qysqy, kórikti jerlerdi sýret pen vıdeoǵa túsirip, #Qazalemi heshtegimen áleýmettik jelige júkteýi qajet. Eń kreatıvti jumystardyń avtorlaryna syılyqtar — jańa smartfondar men shıpajaıǵa joldama beriledi. Baıqaý qorytyndysy 27 jeltoqsanda jarııalanady.
Aıta keteıik, budan buryn týǵan jerdiń tabıǵatyn áleýmettik jeli arqyly tanytyp júrgen Tólebı aýlanynyń turǵyny jaıynda jazǵan bolatynbyz.
Sonymen qatar, kentaýlyq turǵyn qysqy keıipke engen kenshiler qalasynyń sýretterin jelige júktep, #Qazalemi heshtegimen jarııalaǵan baıqaýǵa qatysqany habarlandy.