Atajurtqa atpen sapar shekken qandastar Astanaǵa jetti
ASTANA. KAZINFORM — Qytaıdyń Tarbaǵataı aımaǵynan atpen jolǵa shyqqan jas jubaılar — Qýanbek Túsiphanuly men Jaına Erkinqyzyn Astana halqy ystyq yqylaspen kútip aldy.
Olar Tarbaǵataı aımaǵyna qarasty Saýan aýdanynan 8 tamyz kúni jolǵa shyqqan bolatyn. 74 kúnin at ústinde ótkizgen jolaýshylar qazaqtyń ulan-ǵaıyr dalasyn at tuıaǵymen dúbirletip, Saryarqaǵa jetti. Sapardyń jalpy aralyǵy — 2 500 shaqyrymnan asady.
— Oıǵa alǵan úlken armanymyz oryndaldy. Erekshe qýanyshtymyn! Áserimdi aıtyp jetkize almaımyn. Bul sapar — ómirimizde óshpesteı oryn alǵan erekshe estelik bolyp qalady, — deıdi Qýanbek Túsiphanuly.
Foto: Agıbaı Aıapbergenov/ Kazinform
Saıahatshylar at jalyndaǵy alys sapardyń qıyndyǵyn jol boıyndaǵy ystyq yqylaspen qarsy alyp, kómek kórsetken aqpeıil jandardyń izgi nıeti umyttyryp jibergenin aıtady.
— Shekaradan ótkeli joldaǵy eldiń ystyq yqylasy, peıili, meıiri bizge tilekshi bolyp, baryn berip, joǵymyzdy tolyqtap, júgirip júrgen izgi nıeti bizdi erekshe tebirentti. Tipti orys, túrik sekildi ózge ult ókilderi de bizdi estip, alystan izdep kelip, azyq-túlik berip, kómektesip jatyr. Jol boıy tileýles bolyp, qoldaý kórsetken barsha aǵaıynǵa alǵysymyz sheksiz. Bul — bir otbasynyń emes, tutas ultymyzdyń sapary bolǵandaı. Sapardan alǵan áserimiz óte keremet: ásem tabıǵat, qonaqjaı el, joldaǵy kórikti jerlerdi kórip, bilgenimizdi túsirip, áleýmettik jelige jarııalap otyrdyq. Artta qalǵan alystaǵy aǵaıyn da habarlasyp, eldiń yqylasyna rıza bolyp sálem joldap jatyr, — deıdi jubaılar.
Foto: Agıbaı Aıapbergenov/ Kazinform
Kútip alý sharasy aıasynda Dúnıejúzi qazaqtary qaýymdastyǵynyń ókilderi jolaýshylardy arnaıy tósbelgimen marapattap, alǵys hat tabys etti.
Alys joldy atpen baǵyndyryp, Astanaǵa jetken qandastarymyzdy kútip alýǵa kelgen Májilis depýtaty Erlan Saırov jastardyń isi eldi bereke-birlikke shaqyrǵanyn atap ótti.
— Búgin qazaq álemi úshin óte aıtýly kún dep aıtýǵa bolady. Óıtkeni sonaý arǵy betten Qýanbek pen Jaına qaryndasymyz qazaqtyń qarashańyraǵyna at terletip, elimizge degen saǵynyshyn alyp kelip otyr. Bizdi bir qýantatyny — at ústindegi jubaılar qazaq eline kirgennen bastap halqymyz bul azamattarǵa shyn yqylasyn, izgi nıetin kórsetti. Bul — ultymyzdyń yntymaǵy men birliginiń joǵary deńgeıde ekenin kórsetedi. Sondyqtan bul uzaq sapardy qazaq halqynyń yntymaǵy men dostyǵynyń sapary boldy dep aıtýǵa tolyq negiz bar. Osyndaı ıgi sharany qolǵa alǵan jolaýshy jubaılarǵa úlken alǵys bildiremiz. Astanaǵa kelgen qadamdaryńyz qutty bolsyn! Álemniń ár túkpirindegi qandastarymyz qazaq eline jınala bersin, — dedi Erlan Saırov.
Bul Qýanbek pen Jaınanyń alǵashqy alys sapary emes. Qol ustasqan qos ǵashyq 2021 jyly Shyńjańnan jolǵa shyǵyp, 4 000 shaqyrymdaı joldy atpen júrip ótip, Beıjińge barǵan eken.
Aıta keteıik, buǵan deıin saıtymyzda saıahatshylardyń uzaq sapary týraly maqala jaryq kórgen edi.