Ataýly áleýmettik kómek jańa ádispen taǵaıyndalady

NUR-SULTAN. QazAqparat – Ataýly áleýmettik kómek taǵaıyndaý kezinde zań buzý faktilerin boldyrmaý úshin búkil protsess ortalyqtandyrylǵan formatqa aýystyrylady. Bul týraly QR Eńbek jáne halyqty áleýmettik qorǵaý mınıstri Serik Shápkenov vedomstvonyń keńeıtilgen alqa májilisinde aıtty, dep habarlaıdy QazAqparat tilshisi.

Serik Shápkenovtiń málimeti boıynsha, 2021 jyldyń qorytyndysy boıynsha 198,4 myń otbasyna ataýly áleýmettik kómek taǵaıyndalǵan. Bul 2020 jyldyń kórsetkishinen 7,4% joǵary.

«Ataýly áleýmettik kómek alatyn otbasylardan shyqqan 517,2 myń balaǵa kepildik berilgen áleýmettik toptama berildi. Onyń ishinde 259,4 myń mektep jasyna deıingi bala, 257,8 myń mektep jasyndaǵy bala bar. Kepildik berilgen áleýmettik toptama tóleýge 20,5 mlrd teńge qarastyrylǵan.

AÁK alýshylar sanynyń ósýine baılanysty 2021 jyly mınıstrlik qyzmetkerleri AÁK taǵaıyndaýǵa kóshpeli monıtorıng júrgizdi. Onyń qorytyndysy boıynsha jekelegen óńirlerde zań buzý faktiler anyqtaldy. Bul kómek alýshylardyń ósýine ákeldi. Mysaly, Shymkentte 2021 jyldyń qorytyndysy boıynsha AÁK alýshylar sanynyń ósýi 28,5% boldy», - dedi vedomstvo basshysy.

Onyń aıtýynsha, mundaı faktiler qaıtalanbaýy kerek.

«Ol úshin bıyl tólemderdi AÁK tetiginiń ashyqtyǵyn qamtamasyz etetin «Azamattarǵa arnalǵan úkimet» memlekettik korporatsııasy arqyly ortalyqtandyrý jumystary bastaldy», – dedi Serik Shápkenov.