Ataýly áleýmettik kómek qurylymynda balaly otbasylar basym
ASTANA. QazAqparat - Áleýmettik-demografııalyq kórsetkishter boıynsha kúnkórisi tómen kóp balaly otbasylardyń 75,7 paıyzy ońtústik óńirlerde turady. Bul týraly Parlament Májilisindegi Úkimet saǵatynda QR Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat.
«Ataýly áleýmettik kómek alýshylardyń qurylymynda balaly otbasylar basym. Olar shamamen 41 paıyzyn quraıdy. Áleýmettik-demografııalyq kórsetkishter boıynsha kúnkórisi tómen kóp balaly otbasylardyń 75,7 paıyzy ońtústik óńirlerde turady. Atap aıtqanda, Shymkent qalasynda, Túrkistan oblysynda, Qyzylorda oblysynda, Jambyl oblysynda jáne Almaty oblysynda ornalasqan», - dedi mınıstr.
Onyń sózine qaraǵanda, ataýly áleýmettik kómek alýshy otbasylardyń qurylymynda 25 paıyzyn tolyq emes otbasy qurady. Budan basqa, shartsyz aqshalaı kómek alýshylardyń quramynda tolyq emes otbasylardyń úlesi 87,4 paıyz.
«Ataýly áleýmettik kómek alýshylardyń arasynan áleýmettik statýstar bólinisinde balalardyń sany kóbirek - 321,1 myń bala nemese 63,7 paıyz», - dedi Mádına Ábilqasymova.
Basqa sanattarǵa tómendegi adamdar kiredi: balalarǵa, múgedekterge, qarttarǵa kútim kórsetýmen aınalysatyn adamdar - 18,6 paıyz (toqsan úsh myń jeti júz adam); kómekke júgingen sátte jumys istep júrgen adamdar - 8,4 paıyz ( qyryq eki myń eki júz adam); ózin-ózi jumyspen qamtyǵandar - 4,7 paıyz) ( jıyrma úsh myń jeti júz adam); jumyssyzdar - 1,8 paıyz.
Sondaı-aq stýdentter - 2,1 paıyz (on myń tórt júz adam); múgedekter - 0,5 paıyz (eki myń alty júz adam); zeınetkerler - 0,3 paıyz ( bir myń tórt júz adam).
Budan buryn habarlanǵandaı, Májilistegi Úkimet saǵatynda QR Eńbek jáne halyqty áleýmettik qorǵaý mınıstri ataýly áleýmettik kómektiń jańa formatyn jetildirý boıynsha usynystar pysyqtalyp jatqanyn málim etti.
Sonymen qatar Mádına Ábilqasymova kedeılik deńgeıin tómendetýge qatysty málimetterdi jarııalady.
