Ataýly áleýmettik kómek alýshylardyń 66 paıyzy aýylda turady

«2018 jyly memlekettik bıýdjette jańa formattaǵy ataýly áleýmettik kómekti engizý úshin  28,9 mıllıard teńge, onyń ishinde nysanaly transfertter esebinen respýblıkalyq bıýdjetten 18,4  mıllıard teńge jáne jergilikti bıýdjetten 10,6  mıllıard teńge kózdelgen.  2018 jylǵy 9 aıǵa ataýly áleýmettik kómek tólemderiniń somasy 19,5  mıllıard teńgeni nemese 67,4 paıyzdy qurady», - dedi mınıstr Parlament Májilisindegi Úkimet saǵatynda. .

Respýblıkalyq bıýdjetten bólingen nysanaly transfertterdiń edáýir ıgerilýi myna aımaqtarda baıqaldy: Túrkistan oblysynda (100%), Shyǵys Qazaqstan oblysynda (99,5%), Soltústik Qazaqstan oblysynda (99,1%), Pavlodar oblysynda (91%), sondaı-aq Shymkent qalasynda (99,9%).

Al Almaty qalasynda (16,9%), Astana qalasynda (34,4%), sondaı-aq Mańǵystaý oblysynda (46,8%) bólingen transfertter tómen deńgeıde ıgerilgen.

«9 aıdyń qorytyndysy boıynsha jańa formatta ataýly áleýmettik kómek alýshylardyń sany 504  myń adamdy nemese 97,3 myń  otbasyn quraıdy. Onyń ishinde 72,4 myń adam nemese ataýly áleýmettik kómek alýshylardyń 14,4 paıyzy shartsyz aqshalaı kómek, al 431,6 myń adam, ıaǵnı 85,6 paıyzy shartty aqshalaı kómek alady», - dedi vedomstvo basshysy.

Óńirler bólinisinde ataýly áleýmettik kómek alýshylardyń kóbi Túrkistan oblysynda - 34,8 paıyz, Jambyl oblysynda - 11,7  paıyz, Almaty oblysynda - 10,7, Qyzylorda oblysynda - 7, sondaı -aq Shymkent qalasynda - 9,7 paıyz.

«Alýshylardyń 66 paıyzy aýyldyq jerlerde jáne 34 paıyzy qalalyq jerde turady», - dep naqtylady mınıstr.

Budan buryn habarlanǵandaı, Májilistegi Úkimet saǵatynda QR Eńbek jáne halyqty áleýmettik qorǵaý mınıstri ataýly áleýmettik kómektiń jańa formatyn jetildirý boıynsha usynystar pysyqtalyp jatqanyn málim etti.

Sonymen qatar Mádına Ábilqasymova kedeılik deńgeıin tómendetýge qatysty málimetterdi jarııalady.