Ataýly áleýmettik kómekti taǵaıyndaý tártibi ózgeredi
ASTANA. KAZINFORM — Qazaqstandyqtar endi ataýly áleýmettik kómekti jańa tártippen alady. Qujat jobasy «Ashyq NQA» portalynda jarııalandy.
Eńbek jáne halyqty áleýmettik qorǵaý mınıstrligi bıyl aqpanda Memleket basshysynyń Úkimettiń keńeıtilgen otyrysynda bergen kómekke muqtaj jandardyń jıyntyq kirisi men shyǵysyn aıqyndaýdy eskere otyryp, halyqqa áleýmettik kómek kórsetý tetigin jetildirý jóninde sharalar qabyldaýǵa qatysty tapsyrmasyn oryndaý maqsatynda ataýly áleýmettik kómekti taǵaıyndaý qaǵıdalaryna ózgerister engizip otyr.
Jańa buıryq jobasyna sáıkes ataýly áleýmettik kómekti alýǵa úmitti azamat memleketke shyǵys operatsııalaryn, ıaǵnı bank shoty, bank aldyndaǵy qaryzy, mıkrokredıti (bolǵan jaǵdaıda), jınaq salymy men depozıttegi qarajatynyń qozǵalysy týraly málimetterdi usynýy tıis.
— Maqsat — kómekke naqty muqtaj azamattarǵa jıyntyq kirisi men shyǵysyn aıqyndap, áleýmettik qoldaý kórsetý. Ataýly áleýmettik kómek taǵaıyndaý tetigindegi ózgerister kómekke shyn máninde muqtaj azamattardy anyqtaýǵa jáne olarǵa memleket tarapynan nysanaly qoldaýdy qamtamasyz etýge múmkindik beredi, — delingen qujat mátininde.
Sondaı-aq, vedomstvo ataýly áleýmettik kómekti jańa tártippen taǵaıyndaý memlekettik qoldaýdyń ashyqtyǵyn kúsheıtýge yqpal etetinin alǵa tartyp otyr. Qujat jobasy bıyl 5 mamyrǵa deıin qoǵamdyq talqylaýǵa usynylyp otyr, jańa tártip qabyldanǵan jaǵdaıda bıyl jeltoqsanda iske qosylady.
Eske salaıyq, ataýly áleýmettik kómek alatyn qazaqstandyqtardyń tabysy men shyǵysy esepke alý máselesi byltyr qozǵalǵan edi.
Sondaı-aq byltyr jyl sońynda ataýly áleýmettik kómekti kóp alatyn óńirlerdi anyqtaǵan edik.