Ataýly áleýmettik kómekke muqtajdardy JI anyqtaıdy
ASTANA. KAZINFORM — Qazaqstanda jasandy ıntellekt áleýmettik tólemderdi taǵaıyndaý, ataýly áleýmettik kómekti rásimdeý jáne múgedektik tobyn belgileý protsesterine keńinen engizilip jatyr. Bul týraly Eńbek jáne halyqty áleýmettik qorǵaý mınıstri Asqarbek Ertaev Úkimet otyrysynda aıtty.
Mınıstrdiń sózinshe, búginde JI ataýly áleýmettik kómek taǵaıyndaý kezinde ótinish berýshilerdiń turǵyn úı-turmystyq jaǵdaıyn baǵalaýǵa kómektesedi.
— Júıe azamattar usynǵan foto jáne beınematerıaldaryn taldap, olardyń ataýly áleýmettik kómekke muqtaj nemese muqtaj emestigi týraly usynymdar ázirleıdi. Bul óńirlik ýchaskelik komıssııalardyń jumysyn edáýir jeńildetip, sheshim qabyldaý kezindegi sýbektıvti faktorlardy azaıtýǵa múmkindik beredi, — dedi Asqarbek Ertaev.
Sondaı-aq JI múgedektik tobyn belgileý protsesinde de qoldanylady. Júıe azamattardyń medıtsınalyq derekterin, sonyń ishinde anamnezderi men dıagnozdaryn taldap, medıtsınalyq-áleýmettik saraptamanyń táýelsiz qatysýshysy retinde sheshim jobasyn ázirleıdi.
Eńbek mınıstriniń aıtýynsha, bul tásil múgedektik tobyn anyqtaýda ádildikti arttyryp, elimiz boıynsha biryńǵaı tájirıbe qalyptastyrýǵa jáne adam faktorynyń yqpalyn azaıtýǵa múmkindik beredi.
Budan bólek, kórsetiletin memlekettik qyzmetterdi avtomatty túrde taǵaıyndaý júıesi de iske qosylǵan. Bul jaǵdaıda júıe tólem alýshyny ózdiginen anyqtap, qajetti málimetterdi tekseredi jáne aýdandyq nemese oblystyq deńgeılerdegi qosymsha kelisý rásimderinsiz tólemdi taǵaıyndaıdy.
— Bul obektıvtilikti qamtamasyz etedi. Qolmen óńdeletin jumystardy azaıtady. Keıbir memlekettik qyzmetterdi kórsetý merzimi eki kúnnen 10 mınýtqa deıin qysqardy, — dedi vedomstvo basshysy.
Asqarbek Ertaevtyń málimetinshe, búgingi kúnge deıin jańa júıe ataýly áleýmettik kómek kórsetý boıynsha 99 myń ótinishti, al múgedektikti belgileý boıynsha 151 myń ótinishti óńdegen.
Sonymen qatar bıylǵy shilde aıynan bastap 12 myń járdemaqy avtomatty túrde taǵaıyndalǵan.
Buǵan deıin Asqarbek Ertaev endi qazaqstandyqtar jumys izdemeıtinin, jumys adamdy ózi izdep tabatynyn aıtqan edi.
