Ataýly áleýmettik kómek kimderge berilmeıdi — Úkimet 8 ólshemshartyn bekitti
ASTANA. KAZINFORM — Úkimet qaýlysymen memlekettik ataýly áleýmettik kómektiń mólsherin, kórsetý sharttaryn jáne ony kórsetýge qajettilik joq ekeni týraly qorytyndy shyǵarý ólshemsharttary aıqyndaldy.
Qujatqa sáıkes, ataýly áleýmettik kómek (AÁK) kórsetýge qajettilik joq degen qorytyndy shyǵarýǵa negiz bolatyn segiz ólshemshart belgilengen. Olar otbasynyń turǵyn úıine, kólik quraldaryna, banktik shottaryndaǵy operatsııalarǵa, qaryzdary men jınaqtaryna qatysty.
Ýchaskelik komıssııa atalǵan ólshemsharttardyń bireýi nemese birnesheýi anyqtalǵan jaǵdaıda ataýly áleýmettik kómek kórsetýge qajettilik joq degen qorytyndy shyǵara alady.
Atap aıtqanda, otbasynyń menshiginde birneshe turǵynjaıdyń bolýy osyndaı negizderdiń biri sanalady. Alaıda barlyq turǵynjaıdyń jalpy paıdaly aýdany otbasynyń bir múshesine shaqqanda 18 sharshy metrden aspasa nemese turǵynjaıdyń apattyq jaǵdaıy tıisti aktimen rastalsa, bul ólshemshart qoldanylmaıdy. Sondaı-aq ótinish berilgenge deıingi sońǵy bes jyl ishinde ıelikten shyǵarylǵan, turýǵa jaramdy turǵynjaı da esepke alynýy múmkin.
Budan bólek, paıda tabý maqsatynda paıdalanylatyn jeke úı-jaıdyń bolýy jáne turǵynjaıy bar adamnyń menshiginde jeke turǵyn úı qurylysyna arnalǵan jer ýchaskesiniń bolýy da eskeriledi. Bul rette jer ýchaskesin jergilikti atqarýshy organnyń jeke menshikke óteýsiz berý jaǵdaıyna erekshelik qarastyrylǵan.
Kólik quraldaryna qatysty talaptar
Otbasynyń menshiginde tehnıkalyq jaramdy kúıdegi bireýden kóp jeńil avtomobıldiń bolýy da AÁK taǵaıyndaý qajettiligin baǵalaý kezinde eskeriledi.
Alaıda bul ólshemshart menshiginde bir nemese eki jeńil avtomobıli bar kópbalaly otbasylarǵa, sondaı-aq quramynda múgedektigi bar balalar nemese birinshi jáne ekinshi toptaǵy múgedektigi bar adamdar bar otbasylarǵa qoldanylmaıdy.
Sonymen qatar otbasynyń menshiginde, ýaqytsha ıeliginde nemese paıdalanýynda tehnıkalyq jaramdy aýyl sharýashylyǵy tehnıkasy, jolaýshylar men júkterdi tasymaldaýǵa arnalǵan avtobýs, shaǵyn avtobýs, júk kóligi, arnaýly nemese arnaıy avtomobıl, sondaı-aq teńiz, ishki sý nemese áýe kóligi bolsa, bul da baǵalaý kezinde eskeriledi.
Banktik operatsııalar men qaryzdar da esepke alynady
AÁK kórsetýge qajettilikti baǵalaý kezinde otbasynyń banktik shottaryndaǵy shyǵys operatsııalarynyń kólemi de qaralady. Ótinish berer aldyndaǵy toqsanda bir aıdaǵy shyǵys operatsııalarynyń jıyntyq somasy otbasynyń árbir múshesine shaqqanda kedeılik sheginen assa, komıssııa tıisti qorytyndy shyǵara alady.
Bul rette salyqtar men bıýdjetke tólenetin basqa da mindetti tólemder, saqtandyrý tólemderi jáne adamnyń nemese otbasynyń óz shottary arasyndaǵy aýdarymdar esepke alynbaıdy.
Sondaı-aq ótinish berer aldyndaǵy toqsanda ıpotekalyq qaryzdy qospaǵanda, banktik qaryzdar men mıkrokredıtterdiń jalpy somasy otbasynyń árbir múshesine shaqqanda statıstıka organdary esepteıtin eń tómengi kúnkóris deńgeıiniń eki eselengen aılyq mólsherinen joǵary bolsa, bul jaǵdaı da eskeriledi.
Taǵy bir ólshemshart — bir otbasynyń turǵyn úı qurylys jınaq aqshasyna salymdaryn qospaǵanda, 200 aılyq eseptik kórsetkishten asatyn banktik salymynyń bolýy.
Qujat 2027 jylǵy 1 qańtardan bastap qoldanysqa engiziledi.
Buǵan deıin jasandy ıntellekt áleýmettik tólemderdi taǵaıyndaý, ataýly áleýmettik kómekti rásimdeý jáne múgedektik tobyn belgileý protsesterine keńinen engizilip jatqanyn jazǵan edik.
