Ataýly áleýmettik kómek alatyn qazaqstandyqtardyń tabysy men shyǵysy esepke alynady
ASTANA. KAZINFORM – Eńbek jáne halyqty áleýmettik qorǵaý mınıstrliginde ataýly áleýmettik kómek kórsetýdiń jańa tásilderi talqylandy.
Memleket basshysy azamattardyń shyǵystaryn eskere otyryp, ataýly áleýmettik kómek kórsetý tásilderin qaıta qaraý mindetin qoıdy. Osyǵan baılanysty Otbasynyń tsıfrlyq kartasy men memlekettik jáne memlekettik emes uıymdardyń júıelerimen ıntegratsııalardy paıdalana otyryp, áleýmettik kómek kórsetýdi transformatsııalaý kútilýde.
Eńbek jáne halyqty áleýmettik qorǵaý mınıstrligi Áleýmettik kómek departamentiniń basshysy Aınur Ábdirahmanovanyń aıtýynsha, qazir múddeli memlekettik organdarmen birlesip AÁK alýǵa úmitker qazaqstandyqtardyń negizgi shyǵystaryn esepke alý jáne verıfıkatsııalaý tetigi pysyqtalyp jatyr. Oǵan azamattardyń jyljymaly nemese jyljymaıtyn múlikti satyp alýǵa, oqý aqysy men qosymsha bilim alýǵa, demalys pen oıyn-saýyqqa, saýyqtyrýǵa, jıhaz, turmystyq tehnıka zattaryn satyp alýǵa, kredıtterdi óteý taǵy sol sııaqty shyǵyn túrlerin kirgizý josparlanýda.
«Usynylyp otyrǵan algorıtm AÁK taǵaıyndaýǵa ótinish bergen azamattarǵa olardyń kiristeri men shyǵystaryn tekserýge kelisim alý úshin SMS-habarlama jiberýdi kózdeıdi. Biraq, banktik qupııany ashý jáne úshinshi tulǵalarǵa aqparatqa qol jetkizýge qatysty emes. Tekserýler aqparattyq júıelerdi ıntegratsııalaý esebinen avtomatty túrde júrgiziledi», – dedi departament basshysy Aınur Ábdirahmanova.
Sondaı-aq, mınıstrlikten AÁK taǵaıyndaýdyń jańasha tetigi kómekke shyn máninde muqtaj azamattardy anyqtaýǵa jáne olarǵa memleket tarapynan nysanaly qoldaýdy qamtamasyz etýge múmkindik beretini aıtyldy.
Vedomstvonyń málimetinshe, 2024 jylǵy 1 tamyzdaǵy jaǵdaı boıynsha 70,2 myń otbasyndaǵy 372 myńǵa jýyq azamatqa ataýly áleýmettik kómek alǵan. Bıyl atalǵan maqsatqa bıýdjetten 60,5 mlrd teńge qarastyrylǵan.
