Atasynan qalǵan qarýdy tirketpegen atyraýlyqqa 73,8 myń teńge aıyppul salyndy

ATYRAÝ. KAZINFORM – Atyraý oblysynyń turǵyny atasynan qalǵan qos uńǵyly ańshy qarýyn zańsyz saqtaǵan. Sol úshin oǵan 73 myń 840 teńge aıyppul salyndy.

Qyzylqoǵa aýdandyq sotynyń málimetinshe, quqyq buzýshy S. sharýa qojalyǵynda 16 kalıbrli, «B» markaly, qos uńǵyly ańshy qarýyn zańsyz saqtap kelgen. Bul qarý ishki ister organdarynda tirkelmegen.

«️Atyraý oblysynyń Qyzylqoǵa aýdandyq sotynda QR Ákimshilik quqyq buzýshylyq týraly kodeksiniń 482-babynyń 1-bóligimen boıynsha ákimshilik quqyq buzýshylyq týraly is qaraldy. Krımınalıst mamannyń qorytyndysyna sáıkes ańshy qarýynyń atýǵa jaramdy ekeni anyqtalǵan. Sot otyrysynda S. ákimshilik quqyq buzýshylyq jasaǵanyn, kináli ekenin moıyndady. Ózine qatysty toltyrylǵan ákimshilik quqyq buzýshylyq týraly hattamamen kelisetinin, atalǵan qarýdyń atasynan qalǵanyn, ishki ister organynda tirkelmegenin aıtyp, aıǵaq keltirdi», - dep málim etti aýdandyq sottan.

Sot qaýlysymen S. atalǵan bap boıynsha kináli dep tanyldy. Oǵan ákimshilik quqyq buzýshylyq jasaǵany úshin 73 myń 840 teńge aıyppul salyndy.

Sot qaýlysy zańdy kúshine endi.

Eske sala ketelik, buǵan deıin Atyraýda qos azamattyǵyn jasyrǵan er adamǵa 516 myń teńge aıyppul salynǵanyn habarlaǵan bolatynbyz.