«Atamura» korporatsııasy «Qazaqstan tarıhy» bes tomdyq akademııalyq basylymyn shyǵaryp, jobany qorytyndylady
ALMATY. 15 aqpan. QazAqparat /Ádilet Musahaev/ - «Qazaqstan tarıhy» bes tomdyq akademııalyq basylymyn shyǵarý jobasyn 1995 jyly akademık Manash Qozybaevtyń tusynda qolǵa alǵan edik", -
dedi búgin «Atamura» korporatsııasynyń prezıdenti Rahymǵalı Qul-Muhamed Almatyda ótken baspasóz máslıhatynda.
R. Qul-Muhamed korporatsııa Sh.Ýálıhanov atyndaǵy Tarıh jáne etnologııa ınstıtýty men Á.Marǵulan atyndaǵy arheologııa ınstıtýtymen birige otyryp úlken jobany qorytyndylap otyrǵandyǵyn jetkizdi. Onyń aıtýynsha, 1996 jyly birinshi tomy jaryq kórgen. Onda tas dáýirinen mońǵol shapqynshylyǵyna deıingi kezeń qamtylǵan. Ekinshi tom 1997 jyly orys tilinde, 1998 jyly qazaq tilinde shyqqan. «Negizinen, ekinshi tomda 13- ǵasyr men 18-ǵasyrdyń basyna deıingi aralyq qamtylyp, qazaq handyǵynyń qurylǵandyǵyna úlken mán berilgen. Dálirek aıtqanda, 1466 jyldaǵy Jánibek pen Kereıden bastap Qasym han, Haqnazar, Táýekel, Esim, Jáńgir handardyń memleket basqarýyndaǵy alatyn ornyna erekshe mán berilgen», - deıdi korporatsııa prezıdenti.
Al, úshinshi tomda 18- ǵasyr men 1917 jyl aralyǵy baıandalǵan. Munda Jońǵar shapqynshylyǵy men Qazaqstannyń áleýmettik-saıası sharýashylyǵy jáne mádenı ómiri qarastyrylǵan. «Osy tomda tanymal handarymyz Abylaı hannyń, Kenesarynyń, Ábilqaıyr hannyń tulǵalyq rólderine de erekshe nazar aýdarylǵan. Aǵartýshylyq salada qazaqqa úlken eńbek sińirgen Sh.Ýálıhanovtyń, Y.Altynsarınniń jáne A.Qunanbaevtyń da tarıhyna toqtalǵan», -deıdi R. Qul-Muhamed.
1917 jyldan 1987 jyl aralyǵyn qamtyǵan tórtinshi tom 2010 jyly jaryq kórgen. "Onda burynnan oń baǵasyn almaı júrgen asharshylyq, qýǵyn-súrgin oqıǵalaryna erekshe mán berilgen. Besinshi tom jeltoqsan oqıǵasynan bastalady. Sondaı-aq táýelsizdik alǵan jyldardaǵy Qazaqstannyń qol jetkizgen jetistikteri men tarıhymyz keńinen qamtylady", - dep atap ótti óz sózinde R. Qul-Muhamed.
