Atamqulov Qazaqstanda «Kıberqalqan» júıesiniń qurylýy týraly aıtyp berdi
ASTANA. QazAqparat - Qazaqstannyń Qorǵanys jáne aeroǵarysh ónerkásibi mınıstri Beıbit Atamqulov Qazaqstannyń «Kıberqalqan» júıesi qalaı jasaqtalyp jatqandyǵyn aıtyp berdi, dep habarlaıdy QazAqparat.
«Qazaqstannyń Kıberqalqany júıesi» elimizdiń aqparattyq jáne kıberqaýipsizdigi salasyndaǵy memlekettik organdarmen júzege asyrylatyn uıymdastyrýshylyq-quqyqtyq jáne uıymdastyrýshylyq-tehnıkalyq sharalardyń kesheninen, apparattyq-baǵdarlamalyq keshender men jobalarynan turady. Zańnamalyq bazanyń basym bóligi daıyndalyp bitti», - dedi mınıstr Úkimet otyrysynda.
«Elektrondy shekara dep atalatyn kommýnıkatsııany basqarýdyń ortalyqtandyrylǵan júıesi bar, shıfrdi qoldanatyn zańsyz aqparatqa shekteý qoıatyn qaýipsizdik sertıfıkaty jasaldy», - deıdi ol.
Aıta keteıik, bir apta buryn, Elbasy el qaýipsizdigin aqparattyq deńgeıde qamtamasyz etetin «Kıberqalqan» júıesin qurýdy tapsyrǵan bolatyn.
«Kıberqylmyspen kúrestiń ózektiligi barǵan saıyn arta túsýde. Úkimet pen Ulttyq qaýipsizdik komıtetine «Qazaqstan kıberqalqany» júıesin qalyptastyrý sharalaryn qabyldaýdy tapsyramyn», - dep atap ótti Nursultan Nazarbaev 31 qańtar kúni jarııalanǵan Joldaýynda.
