Atamekenniń sezi: Shaǵyn bıznes jarna tóleýden taǵy úsh jylǵa bosatyldy
ASTANA. QazAqparat - Búgin «Atameken» ulttyq kásipkerler palatasynyń V sezinde shaǵyn bıznesti jarna tóleýden taǵy úsh jylǵa bosatý máselesi daýysqa salyndy. Delegattardyń basym bóligi atalǵan bastamany qoldady, dep xabarlaıdy QazAqparat tilshisi.
Palata basshysy Abylaı Myrzaxmetovtyń aıtýynsha, bes jyl buryn «Atameken» qurylǵanda depýtattar shaǵyn bıznesti jarna tóleýden bosatýdy talap etti.
«Bul degenimiz, 108 mıllıon teńgege deıin aqsha aınalymy bar kásipkerler jarna tólemeıdi. Endi, ótpeli kezeńnen keıin osy bastama taǵy uzartylyp otyr», - dedi A.Myrzaxmetov.
Resmı málimetke sáıkes, búginde respýblıka boıynsha bir mıllıonnan astam bıznesmen bar. Zań boıynsha barlyǵy «Atamekenniń» múshesi bolyp sanalady. 2014 jyldan beri jarnany iri jáne orta bıznes ókilderi tólep keledi. Ol - shamamen 22 000 kásipkerlik nysan. Al aqsha aınalymy 60 000 AEK-ten aspaıtyn kásipkerler jarna tóleýden taǵy úsh jylǵa bosatylyp otyr. Olardyń deni - jeke kásipkerler, sharýa jáne fermerlik qojalyqtary. «Atameken» UKP barlyǵyna teń dárejede kómek kórsetip otyrady.
Al fermerler odaǵynyń basshysy Áýezxan Darynov shaǵyn bıznesti jarna tóleýden bosatýǵa qarsy. Onyń aıtýynsha, jarnanyń somasy kóp emes. Sondyqtan atalǵan tólem jasalsa, jergilikti jerde kásipkerlerge kómek berý sharalary kúsheıedi. Salalyq uıymdardyń qarjylyq jaǵdaıy da jaqsarady.
«Jylyna 12 myń teńge kóp qarjy emes qoı. Ony tólese, árbir aýdanda ókilderdi ustaýǵa bolady. Mysaly, qazir fermerler odaǵynyń ókilderi tegin jumys istep jatyr. Mynaý Soltústik Qazaqstanda mıllıondaǵan gektar egin qardyń astynda qalyp qoıǵanda onyń bárin kim kóterdi? Fermerler odaǵynyń ókilderi kóterdi? Qarjy alyp jatqan adamdar emes, tegin jumys jasaıtyndar kómektesti. Al bizdiń ókilimiz qosymsha qarjy alsa, ol odan da qatty jumys isteıdi. Sosyn tótenshe jaǵdaıda qarjylaı kómek alýǵa bolady», - deıdi Á.Darynov.
Aıta keteıik, sezd kezinde Úkimet pen «Atameken» UKP arasynda jańa kelisimge qol qoıyldy. Sebebi kelesi aıda besjyldyq kelisimniń merzimi aıaqtalady. Osyǵan baılanysty bılik kásipkerler uıymynyń quramynan shyǵady. Al qazirgi áriptestik jańa kelisimniń negizinde jalǵasady.
«Endi, ózderińiz jaqsy bilesizder, náreste dúnıege kelgende ata-anasy ony álpeshtep ósiredi. Aıaǵyna turǵansha qamqorlyq jasaıdy. Al aıaǵyna turyp ketken balanyń túısigi bolsa, ol ata-anasyna qamqorlyq jasaıdy, ózine tirek bolady. «Atameken» bes jyldyń ishinde jyldap emes, kúnde ósti. Bes jylda júrip ótken jolyn qarańyzdar. Búginde «Atameken» Úkimettiń tiregine aınaldy. Bes jyl ótti. Endi, biz óz ókilettigimizdi toqtatyp, qazaqsha aıtqanda «Atamekenniń» enshisin bólip berip, úlken jolǵa shyǵaryp otyrmyz. Bizdiń aıtarymyz, aq jol!», - dedi QR Premer-Mınıstri Baqytjan Saǵyntaev.
Foto: atameken.kz
