«Atamekenniń» qatysýymen barlyq óńirde kedendik rásimdeý aımaǵy qurylady
Bul jaıynda búgin elordada ótip jatqan Túrkitildes memleketter iskerlik keńesiniń 5-otyrysy barysynda «Atameken» Ulttyq kásipkerler palatasy basqarmasynyń tóraǵasy Abylaı Myrzahmetov málim etti, dep habarlaıdy QazAqparat.
«Árbir óńirde kedendik rásimdeý aımaǵyn qurý týraly sheshim qabyldandy. Premer-Mınıstr Baqytjan Saǵyntaev oblystarǵa usynys jasap otyr. Eger bizde seriktester bolsa, onda ol berýge daıyn. Kedendik rásimdeý aımaqtary standartqa saı, bızneske yńǵaıly bolýy úshin palataǵa bermek. Biz jeke ınvestorlarmen bul jumysty júzege asyrýymyz qajet. Nátıjesinde palatanyń bedeli men múmkinshiligi kóteriletin bolady», - dedi Myrzahmetov.
Onyń sózine qaraǵanda, Úkimet basshysy keden arqyly júkterdiń jedel ótýi jumystaryn jeke baqylaýynda ustap otyr. Kedendik kedergilerdi, ásirese, Aqtaýda túbegeıli qysqartý jónindegi josparǵa qol qoıylǵan. Premer-Mınıstr Aqtaýǵa úsh márte baryp, jaǵdaıdy zerdelep qaıtty. Nátıjesinde qujattar sany qysqartylyp, veterınarlyq jáne fıtosanıtarlyq baqylaý kedende júzege asyrylatyn boldy. Eń birinshi kezekte Aqtaý men Qorǵastaǵy kedendik ınfraqurylym jaqsartyldy.