Atamekenine oralǵan qandastar Qazaqstannyń qaı óńirlerine qonystanady

NUR-SULTAN. QazAqparat – S. Seıfýllın atyndaǵy Qazaq agrotehnıkalyq ýnıversıtetiniń professory, ekonomıka ǵylymdarynyń kandıdaty Qaırat Bodaýhan shet elderden kóship kelgen qandastardyń qaı óńirlerge qonystanatynyn aıtyp berdi, dep habarlaıdy QazAqparat tilshisi.

«2012 jyly oralmandar úshin 2011-2014 jyldarǵa arnalǵan kvota aıqyndaý týraly Úkimet qaýlysy keri qaıtaryp alyndy. Máselen 2012-2017 jyldary etnıkalyq qazaqtardy qonys aýdarýǵa kvotalar múldem belgilenbedi. Alaıda, osy jyldarda el aýmaǵyna memlekettiń eshbir qoldaýynsyz, óz múmkinshilikterimen 120 303 qandas kelip, ornalasqan», - dedi Qaırat Bodaýhan «Otandastar qory» KEAQ janyndaǵy qoǵamdyq komıssııanyń otyrysynda.

Onyń aıtýynsha, demografııalyq ahýaly tómen dep esepteletin bes óńir – Aqmola, ShQO, Qostanaı, Pavlodar jáne Soltústik Qazaqstan oblystaryndaǵy kóshi-qon jaǵdaıy alańdatyp otyr. Sońǵy bes jylda atalmysh óńirlerdegi syrtqy kóshi-qon saldosy - 87 633, ishki kóshi-qon saldosy - 86 098 adamdy qurap otyr.

«Al qazirgi kezeńde QR Úkimetiniń 2016 jylǵy 18 aqpandaǵy № 83 qaýlysyna sáıkes otandastardy qonystandyrý úshin 7 óńir tańdaldy, olar – Aqmola, Batys Qazaqstan, Atyraý, Qostanaı, Shyǵys Qazaqstan, Pavlodar jáne Soltústik Qazaqstan oblystary. Osy sheshim negizinde 2017 jyldan bastap kvotalar otbasy sanymen emes, adam sanymen belgilenedi», - dedi Q. Bodaýhan.

Aıta keteıik, atalǵan 7 oblysqa bıyl 1378 etnıkalyq qazaqqa kvota berilip otyr. 1991 jyldan beri elimizge 1 mıllıonnan astam qandas kóship kelgen.