«Atameken» jappaı tártipsizdikterden bızneske kelgen shyǵyndy óteý mehanızmin ázirledi
Osy oraıda QazAqparat tilshisine «Atameken» ulttyq kásipkerler palatasy basqarma tóraǵasynyń birinshi orynbasary Narıman Ábilshaıyqov shyǵyndy óteýdiń mehanızmderi týraly aıtyp berdi.
«Memleket basshysynyń tapsyrmasy boıynsha bıznestiń zalalyn óteý tásilderi ázirlendi. Bul jumys «Atameken» ulttyq kásipkerler palatasy jáne bıznes ókilderimen tyǵyz ózara is-qımyl jasaı otyryp júrip jatyr. Sondaı-aq, zalal kelgen kásipkerler shyǵynyn esepteý jáne óteý máselesi birinshi vıtse-premer Roman Sklıardyń tóraǵalyǵymen ótken úkimettik komıssııa otyrysynda da aıtyldy», - dedi Narıman Ábilshaıyqov.
Sonymen bızneske keltirilgen zalaldy óteý protsesi qalaı júredi ?
1) kásipker óteý týraly ótinimdi qajetti qujattarmen qosa, InfoKazakhstan arqyly jiberedi. Ótinimge ETsQ arqyly qol qoıylady.
2) ótinimdi óńirlik komıssııa qaraıdy.
3) óńirlik komıssııa zalaldy óteý somasyn memlekettik bıýdjetten bólý týraly sheshim shyǵarady.
4) qarjy memlekettik bıýdjetten zardap shekken kásipkerdiń paıdasyna aýdarylady.
Osy rette «Atameken» UKP úkimettik komıssııa zalaldy óteý protsesi barynsha jedel oryndalady degen úmit bildiredi.
Óteýge tıesili soma qalaı esepteledi?
Óteý somasynyń esebi keltirilgen zalaldyń 3 túri boıynsha anyqtalady:
- jyljymaıtyn múlik (ǵımarattar men qurylystar);
- búlingen jyljymaly múlik pen jabdyq;
- urlanǵan taýarlar.
«Bızneske kelgen zalaldy óteýdiń obektıvti, rastalǵan jáne tez anyqtaıtyn ádisi qaralyp jatyr. Sondaı-aq, baǵalaýshylardyń jumys tártibi merzimi, róli, áreket algorıtmi anyqtalady. Sońǵy kúnderi messendjerlerde «baǵalaý kompanııalary bul jumysqa tartylmaıtyny, sondyqtan olarǵa kásipkerlermen baǵalaý shartyn jasamaýǵa shaqyratyn» habarlama tarap jatyr. Mundaı jalǵan aqparatqa jol bermeýimiz kerek. Osy másele boıynsha Ádilet mınıstrligi men Ulttyq ekonomıka mınıstrliginen resmı pozıtsııany kútemiz», - deıdi ol.
Ulttyq kásipkerler palatasy qarastyryp otyrǵan kelesi másele zalaldy óteý týraly sheshim qalaı shyǵarylady?
«Jaqyn kúnderi Úkimet kásipkerlerge keltirilgen zalaldy óteý mehanızmin qabyldaıdy. Bul mehanızm joǵaryda atalǵan protsedýralardy, sonyń ishinde óńirlik komıssııalar týraly erejeni reglamentteıdi. Qujattyń jobasyn «Atameken» UKP mamandary daıyndap, memlekettik organdarǵa jiberip qoıdy. Barlyq normatıvtik qujat bekitilgen soń InfoKazakhstan saıtynda qoljetimdi bolady. Komıssııa quramyna ákimdik, máslıhat, óńirlik kásipkerler palatasynyń jáne qoǵamdyq birlestikterdiń ókilderin kirgizý usynylǵan», - dedi UKP tóraǵasynyń orynbasary.
Onyń aıtýynsha, zalaldy óteý týraly sheshimdi kásipkerdiń ótinishi jáne joǵaryda sıpattalǵan tıisti qujattar negizinde qarjylandyrý kózine baılanysty óńirlik komıssııa nemese qor komıssııasy shyǵarady jáne zalaldy óteýge ótinim onyń mehanızmi bekitilgen soń qabyldana bastaıdy.
«Kásipkerlerden ótinimderdi qabyldaýdyń biryńǵaı orny InfoKazakhstan platformasy bolyp belgilendi. Jumysty iske qosý úshin tehnıkalyq múmkindik qarastyrylǵan. Odan bólek, 11 qańtarda janashyr bıznes ókilderiniń bastamasymen «Kúshimiz Birlikte» – «Sıla v edınstve» qory quryldy. Bul qor zardap shekken kásipkerlerge qarjylaı kómek kórsetýge daıyndyǵyn bildirdi. Qazir qor naqty erejelerdi ázirlep jatyr. Ondaǵy tásildemeler Úkimet komıssııasy bekitken mehanızmge sáıkes retteledi», - deıdi N. Ábilshaıyqov.
Odan bólek, búginde «Atameken» ulttyq kásipkerler palatasy tótenshe jaǵdaı kezinde zardap shekken bıznesti odan ári qoldaý boıynsha Úkimetke usynystar paketin daıyndap jatyr.