«Atameken» Ulttyq kásipkerler palatasy kezekten tys prezıdenttik saılaý ótkizýdi qoldaıdy - Úndeý

ASTANA. QazAqparat - Búgin elimizdiń jetekshi-bıznes qaýymdastyǵy retinde «Atameken» Ulttyq kásipkerler palatasy Qazaqstan halqy Assambleıasy Keńesiniń kezekten tys prezıdenttik saılaý ótkizý týraly bastamasyna qatysty ózderiniń ustanymyn jarııalap, atalǵan máselege qoldaý bildirdi.

«Barshamyz jahandyq ekonomıka turaqsyzdyǵynyń kýásimiz. Álemdik ekonomıka damýynyń 2015-2016 jyldarǵa arnalǵan boljamdary kóńilge demeý bola almaıdy. Metall men munaıǵa álemdik baǵa aıtarlyqtaı quldyraýda. Bizdiń saýda áriptesterimizde de jaǵdaı qıyndaı túsken», - dedi «Atameken» Ulttyq kásipkerler palatasynyń basqarma tóraǵasy Abylaı Myrzahmetov.

Sonymen qatar, A. Myrzahmetov Elbasynyń bastamasymen «Nurly Jol» atty daǵdarysqa qarsy baǵdarlama júzege asyp jatqanyn, onyń aıasynda ınfraqurylymdyq jobalar júzege asatynyn, jańa jumys oryndary qurylyp, shaǵyn jáne orta bızneske qoldaý bildiriletinin atap ótti. Bızneske qoldaýdan bólek, Údemeli ındýstrııalyq-ınnovatsııalyq damý baǵdarlamasy da júzege asýda.

«Mine, osy sharalardyń barlyǵy Qazaqstannyń daǵdarysty laıyqty eńserýinde, odan myǵym memleket retinde shyǵýyna sheshýshi kúshtiń rólin atqarady. Osyǵan baılanysty biz kezekten tys prezıdenttik saılaý ótkizý ıdeıasyn tolyqtaı qoldaımyz. Bul barlyq memlekettik organdar men bıznes-qoǵamdastyqtyń Elbasy aıqyndaǵan ekonomıkalyq baǵdarlamany júzege asyrýǵa jumyla túsýine járdem bolady. Qazaqstannyń kásipkerler qoǵamdastyǵy elimizdiń ornyqty damýyna baǵyttalǵan bastamalardy árqashan qoldap keledi, qoldaı da bermek», - dedi A. Myrzahmetov.