«Atameken» UKP qyzmetkerleri Aqtóbede terrorıster qolynan qaza bolǵan otbasylarǵa 8 mln teńge aýdarady

ASTANA. QazAqparat - Qazaqstannyń barsha bıznes-qoǵamdastyǵy 5 maýsymda Aqtóbe qalasynda oryn alǵan qaıǵyly oqıǵany aıyptaıdy. Beıbit kezeńde áskerı qyzmetkerler men qatardaǵy azamattardyń lańkester qolynan qaza tabýy barsha qazaqstandyqtardyń nalasyn týdyryp otyr. Bul týraly «Atameken» Ulttyq kásipkerler palatasynyń úndeýinde aıtylady.

Osyǵan baılanysty «Atameken» Ulttyq kásipkerler palatasy terrorıstik shabýyldyń saldarynan qaza bolǵandardyń otbasylaryna kóńil aıta kele, quqyq qorǵaý organdarynyń terrorısterge qarsy baǵyttalǵan áreketin tolyq qoldaıtyndyqtaryn málimdeıdi.

«Quzyrly organdar men jergilikti bılik qylmyskerler men ekstremısterge qarsy ymyrasyz kúresti jalǵastyrýlary qajet. Biz beıbit halyqtyń tynyshtyqta ómir súrýge degen tilegi men umtylysyn qoldaımyz. Memlekettik organdar ǵana emes, jalpy qoǵam bolyp mundaı qylmystardyń aldyn alýǵa kúsh jumyldyrýymyz qajetz. Óz kezeginde «Atameken» QR Ulttyq kásipkerler palatasy Aqtóbede oryn alǵan lańkestik áreket saldarynan qaıtys bolǵan qarapaıym azamattar men áskerı qyzmetkerlerdiń otbasylaryna qoldaý kórsetýge daıyn», - delingen úndeýde.

Sonymen qatar, Ulttyq kásipkerler palatasynyń qyzmetkerleri terrorıster qolynan qaza tapqan aqtóbelikterdiń otbasylaryn qoldaý qajettigin alǵa tartady. Osyǵan baılanysty palata qyzmetkerleri qara jamylǵan otbasylarǵa bir kúndik eńbekaqy kóleminde, ıaǵnı 8 mln teńge shamasynda kómek berýge sheshim qabyldaǵan.