«Atameken» UKP ishki týrızmmen aınalysatyn kompanııalarǵa lıtsenzııany alyp tastaýdy usynady
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Atameken» UKP basqarma tóraǵasynyń orynbasary Gúlnár Qurbanbaeva málim etti.
«Búgingi tańda biz qazaqstandyq týroperatorlardyń elimizdiń ishki týrızmi salasynda baǵdarlaryn damytýdy yntalandyrý, syrttan týrıster tartý boıynsha jumystardy atqarýdamyz. Bul negizinen bizdiń kóshpeli ishki týrızmmen aınalysatyn týroperatorlarǵa ruqsattardy alýdy ońaılatý baǵytynda bolmaq. Ulttyq kásipkerler palatasy soǵan oraı, ishki týrızmmen aınalysatyndarǵa lıtsenzııany alyp tastap, eskertý hat tártibine kóshýdi usynady», -deıdi Gúlnár Qurbanbaeva. Onyń aıtýynsha, lıtsenzııalaýdy alyp tastaý otandyq týroperatorlardy ishki týrızmdi damytýǵa yntalandyratyn bolady. Óıtkeni, UKP ókiliniń aıtýyna qaraǵanda, qazirgi tańda elimizge keletin týrısterge qaraǵanda syrtqa ketýshiler kóp.
Sonymen qatar, Gúlnár Qurbanbaeva ishki týrızmmen aınalysatyn kompanııalar úshin belgili bir biliktilik talaptary saqtalýy tıistigin de alǵa tartady. «Álbette bizge ózimizdiń qazaqstandyq naryqty damytý mańyzdy. Sondyqtan da, biz basy artyq úderisterdi, kedergilerdi alyp tastaýdy usynamyz, degenmen, jaýapkershilik sol qalpynda saqtalýy tıis», dedi ol.
Aıta keterligi, UKP usynysyn Investıtsııalar jáne damý mınıstrliginiń Indýstrııa jáne týrızm departamenti de qoldaǵan. Osyǵan oraı, zańnamalyq aktilerge ózgerister men tolyqtyrýlar engizý jumysy júrgizilýde.