«Atameken» UKP aýyldyq jerlerdi qarjylandyrý tetigin túsindirdi

NUR-SULTAN. QazAqparat – «Atameken» ulttyq kásipkerler palatasy basqarma tóraǵasynyń birinshi orynbasary Narıman Ábilshaıyqov el aýmaǵynda kásipkerlik negizderine oqytý barysy jaıynda baıandady, dep habarlaıdy QazAqparat tilshisi.

«2017-2020 jyldary «Bastaý Bıznes» jobasy boıynsha 151 528 jumyssyz jáne ózin-ózi jumyspen qamtyǵandar kásipkerlik negizderine oqytyldy. Oqytylǵandardyń qatarynan 40 myńnan astam joba iske qosyldy. 4 jyl ishinde olar el aýmaǵynda 60 myńnan astam jumys ornyn ashty», - dedi N. Ábilshaıyqov Ortalyq kommýnıkatsııalar qyzmetinde.

Onyń aıtýynsha, bıyl «Bastaý Bıznes» jobasy boıynsha 30 myńnan astam adamdy oqýty josparlanǵan. 2021 jyly «Jumyspen qamtýdyń 2020-2021 jyldarǵa arnalǵan jol kartasy» baǵdarlamasy aıasynda «Bastaý Bıznes» qatysýshylarynyń jobalaryn qarjylandyrý úshin 22,5 mlrd teńge bólindi.

Óz kezeginde «Atameken» UKP-nyń Mıkroqarjylandyrý jáne jobalardy súıemeldeý departamenti dırektorynyń orynbasary Rınat Kemeshov «Atameken» mıkroqarjylyq uıymdardy el aýmaǵynda ashqanyn eske saldy. Bıylǵy 15 shildeden bastap mıkroqarjylandyrýǵa ótinimder qabyldaý bastaldy. Óńirlerde jańadan bastaǵan kásipkerlerden jalpy somasy 3,5 mlrd teńgege 600-den astam ótinim qabyldandy.

«Aýyldyq jerlerde 7 mln teńgege deıin nesıe bere alamyz. Qalalyq aýmaqtarda 18 mln teńgege deıin, sondaı-aq Shymkent, Aqtaý, Atyraý qalalarynda 23 mln teńgege deıin nesıeni qarastyryp otyrmyz. Onyń sharttaryna toqtalsaq, 6 paıyzdyq jyldyq mólsherleme eskerilgen. Mıkrokredıt merzimi – 5 jylǵa deıin, al mal sharýashylyǵy salasyndaǵy jobalar úshin mıkronesıe merzimi 7 jylǵa deıin qarastyrylǵan. Bul jumys óte jaýapkershilikti talap etedi: biz bilgir mamandar komandasyn qurdyq, ozyq tájirıbeni qabyldadyq, onyń ishinde adamı faktordy barynsha joıýǵa tyrystyq», - dedi ol.