«Atameken» shet elderdegi etnıkalyq qazaqtar men otandastardy qoldaıtyn bolady

NUR-SULTAN. QazAqparat – «Atameken» UKP men «Otandastar qory» kommertsııalyq emes aktsıonerlik qoǵamy arasynda ózara túsinistik jáne yntymaqtastyq týraly memorandým jasaldy. Kelisimge «Otandastar qory» KEAQ prezıdenti Nurtaı Ábiqaev pen palatanyń Basqarma tóraǵasy Abylaı Myrzahmetov qol qoıdy, dep habarlaıdy QazAqparat.

Aıta keteıik, «Otandastar qory» - shet elderde turatyn etnıkalyq qazaqtar men otandastardy qoldaý jumysy boıynsha memlekettik organdar jáne úkimettik emes uıymdarmen naqty baǵyttardy aıqyndap, seriktestik ornatatyn uıym. Al memorandým «Atameken» UKP men qordyń birqatar baǵytta tyǵyz baılanysta jumys atqarýy úshin negiz bolyp tabylady. Máselen, «Atameken» ózinde jınaqtaǵan kásipkerlik týraly bilim bankin paıdalaný, bıznes qurý jáne damytý, palata júzege asyratyn baǵdarlamalar boıynsha oqytý, ınvestorlar men startaptardy izdeý baǵytynda qoldaý jasaıdy.

Sonymen qatar yntymaqtastyq aıasynda «Meniń Atamekenim» jáne bıznes salasyndaǵy sheteldik qazaqtar uıymdaryn álem boıynsha bir jelige biriktiretin «Atameken» Іskerlik úıi» jobasyn iske asyrý máseleleri de qamtyldy. Etnıkalyq qazaqtardyń tarıhı otanyna kóshýin yntalandyrýdy qarastyratyn «Temirqazyq» baǵdarlamasyna derbes basymdyq beriledi.

«Otandastar» qory men «Atameken» UKP birlesken jumysynyń aldaǵy baǵyttary «Otandastar. Bolashaqqa baǵdar» atty halyqaralyq dóńgelek ústel aıasynda ótetin «Atameken» Іskerlik úıiniń» paneldik sessııasynda naqtylanady. Atalǵan shara bıyl 28 qarashada Nur-Sultan qalasynda ótedi. Jıynǵa 20 eldegi qazaq dıasporasynan 150 delegat qatysady.