«Atameken» palatasy jańa pán oqýlyǵyn birlesip ázirleýge úndedi
Qazirgi josparǵa sáıkes, oqýshylar eki jyldyń ishinde bıznes negizderin meńgerip qana qoımaı, óz jobalaryn da daıarlap shyǵady. Oqý baǵdarlamasy boıynsha sabaqtyń 40 paıyzy teorııaǵa arnalsa, qalǵanyn naqty mysaldarmen oıyn túrinde ótkizý kózdelip otyr.
"Máselen, 10-synyp oqýshylary aldymen kásipkerliktiń negizderin meńgeredi. Ekinshi toqsanda olar ózara birigip, kompanııalardy qurý arqyly menedjment, startaptar, ınnovatsııalar, salyq júıesi jáne taǵy basqa qajetti dúnıelerdi ıgeredi. Basqarý fýnktsııalaryn tanı bastaıdy. Úshinshi toqsanda básekelestiktiń qyr-syryn biledi. Al tórtinshi toqsanda oqýshylar naqty bir ónimdi tańdap, taýar satýdyń marketıngin daıarlaıdy. 11-synypta oqýshylar óz ıdeıalaryn iske asyrýy shart", - deıdi jańa pánniń oqý baǵdarlamasyn daıarlaý tobynyń ókili Ermek Dúısenxanov.
Oqý baǵdarlamasynyń jobasy daıyn bolsa da, "Atameken" ulttyq kásipkerler palatasy ony áli de jetildirý kerek dep sanaıdy. Máselen, onlaın rejımde tanymal bıznesmenderdiń dáristerin ótkizýge bolady. "Biz aptasyna eki ret jınalyp, osy máseleni keńinen talqylaıtyn bolamyz. Sondyqtan osy jumysqa barlyq sarapshylar men bıznesmenderdi shaqyramyz. Áleýmettik jelilerde de talqylaýlar júredi. Budan bólek, bilim@atameken.kz poshtasyna usynys joldaýǵa bolady. Biz barlyǵyn qarap shyǵamyz. Bul talqylaýǵa muǵalimder men ata-analar da belsene atsalysýy qajet", - deıdi "Atameken" ulttyq kásipkerler palatasy basqarma tóraǵasynyń orynbasary Eldar Jumaǵazıev.
QR Bilim jáne ǵylym vıtse-mınıstri Bıbigúl Asylovanyń aıtýynsha, kásipkerlikti meńgerýge arnalǵan jańa pán oqýshylarǵa salmaq túsirmeıdi. Sebebi ekonomıka men qarjy pánderiniń ornyna engiziledi.
Atalǵan bastamanyń avtorlary oqýshylardyń ishinen tyń jobalardyń shyǵatynyna úlken senimmen qaraıdy. Bolashaqta ol jobalar EKSPO aımaǵynda qurylatyn IT startaptar parkine qabyldanýy ábden múmkin.