«Atameken» palatasy qazaqstandyq kásipkerlerge úndeý jasady
«Elimizde ekonomıkaǵa, jalpy áleýmettik ahýalǵa qıyndyq ákelgen eki jaǵdaı bolyp otyr. Onyń biri koronavırýs pandemııasy bolsa, ekinshisi – sońǵy aptadaǵy negizgi eksport kózderiniń biri bolǵan munaı baǵasynyń quldyraýy. Osynyń bári jalpy ekonomıkamyzǵa, onyń ishinde shaǵyn jáne orta bıznes kásipkerlerine úlken syn bolyp otyr. Memleket basshysy barlyq jaǵdaıdy baqylaýda ustap otyr. Kúndelikti Úkimet tarapyna da, jaýapty mınıstrlikterge tapsyrma berip jatyr. Biz de atsalysyp, kúndelikti Úkimette ótetin barlyq pikir almasýǵa qatysyp júrmiz», - dep atap ótti Basqarma tóraǵasy arnaıy uıymdastyrylǵan onlaın-brıfıngide.
Ulttyq palata atalǵan oqıǵalarǵa baılanysty kásipkerlerdi koll-ortalyqqa habarlasýǵa jáne saýalnamaǵa qatysýǵa shaqyrǵan.
«Biz de ózimizdiń shuǵyl áreket etetin shtabymyzdy qurdyq. Negizgi maqsatymyz – kásipkerlermen tikeleı baılanysta bolyp jáne keri baılanys ornatý. Onyń úsh kanaly bar. Birinshisi – kásipkerler koll-ortalyqqa qońyraý shalyp, qandaı kásippen aınalysatynyn, eki másele boıynsha qandaı qıyndyqqa tap bolǵanyn aıta alady. Nemese poshta arqyly on shaqty suraqtarǵa jaýap jiberýge bolady. Al 2-3 myń jumysshysy bar úlken kásiporyndarǵa ózimiz tikeleı habarlasamyz. Olarǵa arnalǵan anketanyń suraqtary kóp, óıtkeni úlken kompanııalardyń aınalymdary da, nesıe kólemi de úlken», - deıdi A. Myrzahmetov.
Ulttyq palataǵa bir kúnde myńnan astam kásipker habarlasqan. Olardyń 30 paıyzy – orta bıznes ókilderi, 60 paıyzǵa jýyǵy – shaǵyn bıznes ókilderi, 27 paıyzy – mıkrobıznes ıeleri.
«Olardyń 40 paıyzy óndiris salasynda jumys istese, 65 paıyzy koronavırýsqa baılanysty kóp shyǵynǵa ushyrap jatqan saýda, qyzmet kórsetý salasynyń ókilderi. Olar koronavırýsqa baılanysty karantınniń keri áseri týraly, sol boıynsha qandaı kómek bolatynyn, qandaı sharalar qoldanylatynyn surap otyr. Palataǵa habarlasqan kásipkerlerge rızashylyq bildiremiz. Olar óz qıynshylyǵyn aıtyp qana qoımaı, paıdaly usynystaryn da aıtyp otyr. Jalpy koronavırýsqa baılanysty barlyq sharýashylyq qarym-qatynastar buzyldy. Barlyq memlekette eksport, ımport toqtatyldy. Osy jaǵdaıda ózimizdiń aýyl sharýashylyǵymyzdy, tamaq salasyn damytýymyz kerek. Kóptegen kásipkerler dúrbeleńge salynbaýǵa, kerisinshe bizden buryn koronavırýsqa tap bolǵan elderdiń tájirıbesin muqııat qaraýdy usyndy. Barlyq usynystar, máseleler, málimetter kelesi seısenbide Úkimet otyrysynda jarııalanady», - dedi Abylaı Myrzahmetov.
Onyń aıtýynsha, Qazaqstanda 1,2 mln-ǵa jýyq kásipkerlik sýbektisi jumys isteıdi.
«Barlyq kásipkerge habarlasý qıynǵa soǵady. Sondyqtan, palatanyń biryńǵaı 1432 nómirine elimizdiń kez kelgen núktesinen habarlasýǵa bolady. Ázirge 5 operator jumys istep jatyr, qajet bolsa, olardyń sanyn kóbeıtemiz. Bul jerde esh salaǵa basymdyq bermeımiz. Kez kelgen otandyq kásipker palatǵa habarlasyp, qandaı máselelerge tap bolǵanyn aıta alady», - dedi A. Myrzahmetov.