«Atameken» palatasy Elbasynyń portreti bar banknot xalyqtyń kóńilinen shyǵatynyna senimdi
ASTANA. QazAqparat - "Atameken" ulttyq kásipkerler palatasy Táýelsizdiktiń 25 jyldyǵyna arnalǵan jańa 10 000 myń teńgelik banknotqa qatysty úndeý jarııalady.
Palata basshysy Abylaı Myrzaxmetov te óz oıyn jetkizdi, dep xabarlaıdy QazAqparat tilshisi.
"Ulttyq valıýta - jahandyq naryq júıesindegi el ekonomıkasynyń derbestigin aıqyndaıtyn Táýelsizdiktiń mańyzdy sımvoly. Memlekettiń tól valıýtasy búkil bank júıesiniń turaqtylyǵan qamtamasyz etedi. Al Qazaqstannyń Ulttyq valıýtasy kúni Memleket basshysy beınelengen mereıtoılyq banknottyń tusaýkeseri - el tarıxyndaǵy eleýli oqıǵa. Táýelsizdiktiń 25 jyldyǵyna arnalǵan bul banknot - Nursultan Ábishuly Nazarbaevtyń eren eńbegin elegenimizdiń bir kórinisi. Sebebi Elbasynyń jetekshiligimen Qazaqstannyń tolaǵaı tabystaryn álem qaýymdastyǵy da moıyndaı bastady. Elimizde qolǵa alynǵan ekonomıkalyq reformalar belsendi bıznes ortany qalyptastyrýǵa múmkindik berdi. Qazaqstannyń kásipkerleri Táýelsiz Qazaqstan Respýblıkasynyń ósip-órkendeýi jolynda jańa jobalardy qolǵa alyp, el ekonomıkasynyń damýyna baryn salyp, eńbek etetin bolady", - delingen resmı xabarlamada.
Búgin Astanada Memleket basshysy Nursultan Nazarbaevtyń portreti beınelengen 10 000 teńgelik banknotty tanystyrý rásiminen keıin "Atameken" palatasynyń basshysy Abylaı Myrzaxmetov jańa kýpıýraǵa qatysty óz oıyn bildirgen edi. "Memlekettiń negizgi úsh tiregi bar. Birinshisi - onyń terrıtorııasy, ekinshisi - áskeri, úshinshisi - tól valıýtasy. Sondyqtan bizdiń teńgemiz - Táýelsizdigimizdiń eń bir aıqyn, qundy dúnıemiz. Ony esh ýaqytta joǵaltpaýymyz kerek. Osydan týra 23 jyl buryn Memleket basshysy Nursultan Nazarbaev Táýelsizdiktiń bir belgisi bolatyn teńgemizdi aınalymǵa shyǵardy. Endi, biz Elbasynyń ózine arnap banknot shyǵaryp otyrmyz. Mundaı tájirıbe álemniń barlyq elderinde bar. El tarıhynda ereń eńbegi joǵary baǵalanǵan azamattardyń beınesin óz valıýtalaryna basyp shyǵarady. Sondyqtan, Táýelsizdiktiń 25 jyldyǵyn toılaý qarsańynda xalqymyz Táýelsizdigimizdi alyp berip, memleketimizdi nyǵaıtqan Elbasy Nursultan Nazarbaevqa osyndaı baǵasyn berip otyr. Sondyqtan Tuńǵysh Prezıdentimizdiń ulttyq valıýtada basylyp shyǵýy menińshe halyqtyń kóńilinen shyǵady", - dedi A.Myrzaxmetov.
Aıta keteıik, búgin Astanada ótken "Qazaqstan Táýelsizdigine 25 jyl: ulttyq valıýta" taqyrybyndaǵy konferentsııada Ulttyq bank tóraǵasy Danııar Aqyshev Memleket basshysy Nursultan Nazarbaev beınelengen jańa meıtoılyq 10 000 teńgeni tanystyrdy. Onyń aıtýynsha, jańa kýpıýra 1 jeltoqsan - QR Tuńǵysh Prezıdenti kúnine oraı shekteýli taralymmen bastyrylady.
Ol aqshanyń naqty taralymy jaıynda qolma-qol aqsha basqarmasynyń bastyǵy Toǵjan Ábisheva aıtyp berdi.
Sondaı-aq búgingi shara aıasynda 5 000 teńgeniń mereıtoılyq monetasy tanystyryldy.
Qazaqstannyń qarjygerleri Nazarbaev beınelengen banknotqa qatysty óz úndeýin jarııalap úlgerdi.
